აშშ-ის თეთრი სახლის მიერ გავრცელებული განცხადების თანახმად, აშშ-ის პირველი ლედის, მელანია ტრამპის ჩარევის შედეგად, რუსეთი და უკრაინა ხერსონის ოლქში, რუსეთის მიერ ოკუპირებულ ქალაქ ოლეშკიში, დროებით ცეცხლის შეწყვეტაზე შეთანხმდნენ.
თეთრი სახლის ინფორმაციის თანახმად, შეთანხმება ითვალისწინებს ოლეშკიში ყველა სამხედრო მოქმედების დროებით შეჩერებას, რათა შესაძლებელი გახდეს ჰუმანიტარული დახმარების მიწოდება და მშვიდობიანი მოსახლეობის ევაკუაცია სპეციალურად განსაზღვრული უსაფრთხო დერეფნის გავლით.
განცხადების თანახმად, ადგილობრივი ცეცხლის შეწყვეტის რეჟიმი ძალაში 29 ოქტომბერს უნდა შევიდეს.
მელანია ტრამპის თქმით, ოლეშკიში ჰუმანიტარული ვითარება კატასტროფულია. ქალაქი ფრონტის ხაზზე მდებარეობს, იქ დარჩენილი მოსახლეობის უმრავლესობა კი ხანდაზმული ადამიანებისგან შედგება, რომლებსაც სასწრაფოდ სჭირდებათ სამედიცინო დახმარება, მედიკამენტები, საკვები და სუფთა წყალი.
მოსახლეობას ელექტროენერგია შეზღუდულად მიეწოდებათ და დანაღმულ გზებსა და მუდმივი სამხედრო თავდასხმების საფრთხეში უწევთ ცხოვრება.
„ჩემი ჩარევის გარეშე ქალაქში ჰუმანიტარული დახმარების შეტანა და ხანდაზმული ადამიანების ევაკუაცია შეუძლებელი იქნებოდა“, - განაცხადა აშშ-ის პირველმა ლედიმ.
თეთრი სახლის განცხადების თანახმად, აშშ-ის პირველი ლედი და მისი წარმომადგენელი უშუალოდ თანამშრომლობდნენ რუსეთისა და უკრაინის ხელმძღვანელობასთან, რათა ოლეშკიში ლოკალური ცეცხლის შეწყვეტის პირობები განესაზღვრათ. მელანია ტრამპმა ორივე ქვეყანასთან მოლაპარაკებები წამოიწყო და მხარეებს შორის შეთანხმების მიზნები, ტექნიკური პროცედურები, ვადები და პირობები შეათანხმა.
„ორივე ქვეყნის სამოქალაქო ლიდერები ერთობლივად მოინახულებენ ოლეშკის მცხოვრებლებს მათ სახლებში და განსაზღვრავენ, რა მოცულობის დახმარება სჭირდებათ მათ. მოსახლეობა, რომელსაც ევაკუაცია სურს, კოორდინირებულ მხარდაჭერასა და მის მიერ არჩეულ დანიშნულების ადგილამდე ტრანსპორტირებას მიიღებს. ვფიქრობ, ზოგი რუსეთში წასვლას მოისურვებს, ზოგი კი - უკრაინაში“, - განაცხადა აშშ-ის პირველმა ლედიმ.
მისი თქმით, პროცესის განმავლობაში რუსული და უკრაინული ჯგუფების ადგილზე მუშაობას მიუკერძოებელი ამერიკული მედიაორგანიზაცია გააშუქებს და დააფიქსირებს.
მელანია ტრამპის ყურადღება ოლეშკიში არსებულმა ვითარებამ ნიუ-იორკში, გაეროს გენერალური ასამბლეის 81-ე სესიის ფარგლებში გამართულ ღონისძიებაზე, „ერთად ვაშენებთ მომავალს“, პირადი საუბრის დროს მიიპყრო.
„მე და ჩემმა წარმომადგენელმა დაუყოვნებლივ გამოვიყენეთ საკომუნიკაციო არხი, რომელიც რუსეთთან და უკრაინასთან წინა ექვსი შემთხვევის დროს, 34 ბავშვის ოჯახებში დაბრუნების პროცესში დავამყარეთ. ორივე ქვეყანამ ოპერატიულად დანიშნა ჯგუფები რთული ორგანიზაციული საკითხების, მათ შორის, განაღმვის კოორდინაციისთვის. მას შემდეგ ყველა მხარე დღე და ღამის განმავლობაში მუშაობს“, - განმარტა აშშ-ის პირველმა ლედიმ.
შეგახსენებთ, ევროპარლამენტის ვიცე-პრეზიდენტმა პინა პიჩერნომ შიმშილობა გამოაცხადა, რათა ხერსონის ოლქის ოკუპირებული ქალაქ ოლეშკიში შექმნილი მძიმე ვითარების მიმართ საერთაშორისო ყურადღება მიეპყრო.
