დღეს, პრემიერ-მინისტრი, მამუკა ბახტაძე ტექნიკურ უნივერსიტეტში COMET საერთაშორისო კოლაბორაციის ინტეგრაციის სამუშაო შეხვედრას ოფიციალურად გახსნის.

COMET საერთაშორისო კოლაბორაცია წელიწადში ერთხელ, იაპონიის გარეთ, ე.წ. გასვლით სამუშაო შეხვედრებს რეგულარულად ატარებს.  წლევანდელ სამუშაო შეხვედრას, რომელიც უმნიშვნელოვანესია საერთაშორისო სამეცნიერო თვალსაზრისით, საქართველოს ტექნიკური უნივერსიტეტი 1-5 ოქტომბერს მასპინძლობს. 

 აღსანიშნავია, რომ სტუ-ის მეცნიერთა  ჯგუფი აქტიურად მონაწილეობს KEK-ის უნიკალური COMET ექსპერიმენტის  განხორციელებისთვის საჭირო კვლევით სამუშაოებში. სტუ-ის ჯგუფი COMET-ექსპერიმენტში უდიდესი სუბდეტექტორის, კოსმიკ ვეტო მთვლელების (Cosmic Ray Veto, CRV) დეტექტორული სისტემის შექმნასა და ოპერირებაზეა პასუხისმგებელი.

COMET კოლაბორაცია იაპონიის პროტონების ამაჩქარებლების ცენტრის (JPARC) ბაზაზე ახალი, ამბიციური ექსპერიმენტის ჩატარებას გეგმავს. ამ მიზნით, COMET კოლაბორაციას განზრახული აქვს მოსინჯოს ახალი ფიზიკის არსებობა ე.წ. ლეპტონურ სექტორში. შესაბამისად, COMET ექსპერიმენტი ორი მთავარი პრობლემის დაძლევის წინაშე დგას: 1. ააგოს ამაჩქარებელი, რომელიც ექსპერიმენტულ დანადგარს რეკორდული ინტენსივობის მიონების ნაკადს მიაწვდის. 2. შექმნას დედექტორების სისტემა, რომელიც მგრძნობიარე იქნება ასეთი იშვიათი პროცესების მიმართ.