აშშ-ის სახელმწიფო მდივნის, მარკო რუბიოს განცხადებით, ევროპის დამოკიდებულება რუსულ ენერგორესურსებზე ერთ-ერთი მიზეზი იყო, რის გამოც რუსეთის პრეზიდენტმა ვლადიმირ პუტინმა უკრაინაში სრულმასშტაბიანი შეჭრა გადაწყვიტა.
რუბიომ ამის შესახებ გამოცემა Breitbart News-ის ვაშინგტონის ბიუროს ხელმძღვანელ მეთიუ ბოილთან ინტერვიუში ისაუბრა. მისი თქმით, პუტინს მიაჩნდა, რომ უკრაინაში შეჭრა შეეძლო და ევროპა ამაზე რეაგირებას არ მოახდენდა.
„ის ფიქრობდა, რომ ამის გაკეთება შეეძლო და ევროპა არაფერს მოიმოქმედებდა. ამიტომ, იმედი მაქვს, მათ ეს გაკვეთილი ისწავლეს. როგორც ჩანს, სწავლობენ კიდეც, თუმცა „მწვანე გადაჭარბებების“ 20 წლის შედეგების გამოსწორებას, საკუთარი ენერგეტიკის განვითარებისთვის სათანადო ყურადღების მიქცევასა და ენერგიის ერთ წყაროზე გადაჭარბებული დამოკიდებულების შემცირებას დრო სჭირდება“, - განაცხადა რუბიომ.
რუბიოს თქმით, აშშ-ის პრეზიდენტი დონალდ ტრამპი ჯერ კიდევ პირველი საპრეზიდენტო ვადის დროს აცხადებდა, რომ გერმანიამ თავი რუსულ ენერგორესურსებზე დამოკიდებულებით მოწყვლადი გახადა და კრემლს შესაძლებლობა მისცა, კონფლიქტის შემთხვევაში ენერგომომარაგება შანტაჟის იარაღად გამოეყენებინა.
