იტალიის მთავრობა ქვეყნის ჩრდილოეთ ნაწილში, ქალაქებში მომხდარი ძალადობრივი არეულობის საპასუხოდ, კომენდანტის საათის დაწესების შესაძლებლობას განიხილავს. საკითხი ორშაბათს, 19 ოქტომბერს, ჯორჯია მელონის მთავრობის საგანგებო სხდომაზე განიხილეს. ინფორმაციას იტალიური სააგენტო ANSA ავრცელებს.
სააგენტოს სამთავრობო წყაროების ცნობით, განიხილება კომენდანტის საათის აღსრულების მექანიზმები და გზების ბლოკირების აღკვეთის ზომები.
წყაროების ინფორმაციით, მელონის მთავრობამ შესაბამისი დეკრეტი შესაძლოა უკვე სამშაბათს მიიღოს.
სამთავრობო წყაროების განცხადებით, ხელისუფლება „მტკიცე პასუხს გასცემს“ მომხდარს. ეს მას შემდეგ, რაც ცხოვრების გაძვირების წინააღმდეგ რამდენიმე დღის განმავლობაში მშვიდობიანად მიმდინარე საპროტესტო აქციები მილანში, ტურინსა და ბოლონიაში არეულობასა და ძარცვაში გადაიზარდა.
ამასთან, იტალიის მთავრობა სამართალდამცავი ორგანოების მიერ შეთავაზებულ ზომებსაც განიხილავს, რათა პრევენციული ღონისძიებები და მსგავსი შემთხვევების წინააღმდეგ ბრძოლა უფრო ეფექტიანი გახდეს.
ცნობისთვის, იტალიის დიდი ქალაქები მთავრობის საწინააღმდეგო საპროტესტო აქციებმა 17 ოქტომბერს მოიცვა. დემონსტრანტები ფასების ზრდასა და საჯარო სერვისების ხარისხის დაბალ დონეს აპროტესტებენ. მილანში საპროტესტო აქციების მეორე დღეს პოლიციამ 270-ზე მეტი ადამიანი დააკავა.
