საერთაშორისო სარეიტინგო კომპანია „Scope Ratings”-მა სს „ქართული ლუდის კომპანიისთვის“ BB- , ხოლო ობლიგაციებს BB საკრედიტო რეიტინგის მინიჭებას აფასებს ბიზნესომბუდსმენი. ირაკლი ლექვინაძე ამბობს, რომ ეს მხოლოდ კონკრეტული კომპანიის წარმატება არაა.
„ვფიქრობ, რომ ეს არის ძალიან დიდი წარმატება „ქართული ლუდის კომპანიისათვის“, რადგანაც ავტორიტეტული საერთაშორისო სარეიტინგო კომპანია Scope Ratings GmbH-ი კომპანიას ანიჭებს იმ რეიტინგს, რომელიც კომპანიას გააჩნია. ეს არის არამხოლოდ კონკრეტული კომპანიის წარმატება, არამედ მთელი ინდუსტრიის. ეს ყველაფერი ქართული ბიზნესის წარმატებაა. ამ რეიტინგებს უყურებენ ინვესტორები, რაც მეტყველებს იმაზე, რომ საქართველოში არის შესაბამისი ბიზნესგარემო. ასევე ეს ნიშნავს კომპანიისათვის მეტ გამჭვირვალობას და ორმაგად სასიხარულოა ის ფაქტი, რომ ასეთი რეიტინგი ენიჭება კომპანიას, რომელიც ადგილობრივი წარმოების განვითარებითაა დაკავებული. მნიშვნელოვანია ის ფაქტიც, რომ კომპანიის გეგმებშია ფასიან ქაღალდების განთავსება ადგილობრივ საფონდო ბირჟაზე, რაც ადგილობრივი კაპიტალის ბაზრის განვითარებისთვის არის მნიშვნელოვანი“, აცხადებს ირაკლი ლექვინაძე.
„ქართული ლუდის კომპანიაში“ განმარტავენ, რომ რეიტინგი მინიჭებულ იქნა ეკონომიკურად სტაბილური და მზარდი წარმოების, დივერსიფიცირებული პორტფელის, ბაზრის წილისა და ძლიერი საბალანსო უწყისის გამო, რაც კომპანიის მიმართ სანდოობის მაღალი ხარისხის და ფინანსური მდგრადობის მაჩვენებელია.
რეიტინგის მინიჭებით საერთაშორისო სარეიტინგო სააგენტოს ექსპერტმა სს ქართული ლუდის კომპანია შეაფასა დადებითად და აღიარა კომპანიის ბიზნესის სტაბილურობა და ფინანსური მდგრადობა. აღნიშნული რეიტინგი საშუალებას მისცემს კომპანიას გამოუშვას ლარის საჯარო ობლიგაცია, რაც დადებითი მოვლენაა როგორც კომპანიის ასევე საქართველოში კაპიტალის ბაზრის განვითარებისთვის.
რეიტინგის მიღებისა და ობლიგაციების გამოშვების პროცესის წარმართვაში სს „ქართული ლუდის კომპანიას“ თიბისი კაპიტალი (თიბისი ბანკის შვილობილი საბროკერო კომპანია) ეხმარება.
ს.ს „ქართული ლუდის კომპანია“ ბაზარზე 2011 წლის 03 ივნისს დარეგისტრირდა და რეკორდულ ვადებში - 9 თვეში ბაზარზე წარადგინა ზედაზენის პირველი პროდუქცია. „ქართული ლუდის კომპანია“ უახლესი სტანდარტების ლუდსახარშია არა მხოლოდ საქართველოში, არამედ მთელს მსოფლიოში. ქარხანა მთლიანად აღჭურვილია ევროპის მოწინავე მწარმოებლების დანადგარებითა და ენერგოეფექტური ტექნოლოგიებით, რაც უზრუნველყოფს ზედაზენის პროდუქციის უმაღლეს ხარისხსა და მსოფლიო სტანდარტებს.
როგორც კომპანიაში აცხადებენ, წამყვანი ევროპული საკრედიტო სარეიტინგო სააგენტოს მიერ, ასეთი მაღალი შეფასება, დიდი წარმატებაა, რადგან რეიტინგი შეესაბამება ქვეყნის გრძელვადიან სუვერენულ რეიტინგს და ამავდროულად ასახავს საერთაშორისო ექსპერტების ნდობას კომპანიის გრძელვადიანი განვითარების სტრატეგიისადმი.
,,სს ქართული ლუდის კომპანია ერთ-ერთი პირველია ქართულ კერძო კომპანიებს შორის, რომელმაც მოიპოვა საერთაშორისო საკრედიტო რეიტინგი. აქვე აღსანიშნავია, რომ ჩვენს მიერ მიღებული „BB” რეიტინგი ერთ-ერთი ყველაზე მაღალია, რაც ქვეყანაში მოქმედ, ადგილობრივ კერძო კომპანიებს მიუღიათ. აღნიშნული კომპანიის საქმიანობისა და სტაბილურობის მიმართ ექსპერტების მაღალი სანდოობის გამოხატულებაა და ადასტურებს იმას, რომ „ქართული ლუდის კომპანია“ სრულად შეესაბამება ევროპულ სტანდარტებს - როგორც წარმოებისა და პროდუქციის მაღალი ხარისხით, ასევე ბიზნესის მოწყობისა და მართვის მხრივ. კომპანიაში ამ საერთაშორისო სტანდარტების ინტეგრაციით გაიზრდება ხელმისაწვდომობა კაპიტალის ბაზრებზე, გაიზრდება ინვესტორების ინტერესები, რაც ხელს შეუწყობს ახალი პროექტების წამოწყებას და ქართული ეკონომიკის უფრო მეტად გაძლიერებას.“ - აღნიშნა ს.ს ,,ქართული ლუდის კომპანიის’’ დირექტორმა კახაბერ კოტრიკაძემ
„მოხარული ვართ რომ სს „ქართული ლუდის კომპანიასთან“ ვაგრძელებთ თანამშრომლობას. სქოუპ რეიტინგსის საკრედიტო რეიტინგი და მოსალოდნელი ლარის ობლიგაცია ბევრ ახალ შესაძლებლობას შეუქმნის კომპანიას და მისცემს საშუალებას თავი დაიმკვიდროს ადგილობრივ და საერთაშორისო კაპიტალის ბაზრებზე როგორც უკვე საჯარო ქართულმა კომპანიამ“ აღნიშნა თიბისი კაპიტალის დირექტორმა, ირაკლი ელაშვილმა. ლარში დენომირიებული ობლიგაციის საჯარო განთავსების ტრანზაქციაზე აგენტად კომპანიამ თიბისი კაპიტალი დანიშნა.
ცნობისთვის, Scope Ratings GmbH საკრედიტო რეიტინგებისა და კვლევის მიმართულებით, ფინანსურ-საინფორმაციო მომსახურების სფეროში ერთ-ერთი წარმატებული საერთაშორისო სააგენტოა და საქართველოს ეროვნული ბანკის მიერაა აკრედიტირებული.
