არჩილ ტატუნაშვილის სიკვდილმა მთელ მსოფლიოს კიდევ ერთხელ აჩვენა ოკუპაციისა და ოკუპანტის არაადამიანური სახე, – ამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა ლტოლვილთა და განსახლების მინისტრმა, სოზარ სუბარმა მუხათგვერდის ძმათა სასაფლაოზე განაცხადა, სადაც ტატუნაშვილის ოჯახის წევრები და პოლიტიკოსები გარდაცვალებიდან 40 დღესთან დაკავშირებით იმყოფებოდნენ.
მისი თქმით, არჩილ ტატუნაშვილის სიკვდილმა კიდევ ერთხელ ნათელი გახდა, რომ არ შეიძლება ოკუპაცია ძალიან დიდხანს გაგრძელდეს.
"მთელი მსოფლიო ყოველდღიურად უფრო და უფრო აძლიერებს წნეხს ოკუპანტ რუსეთზე, არა მხოლოდ საქართველოს, არამედ იმ ყველაფრის გამო, რასაც ის აკეთებს უკრაინაშიც და მთელს მსოფლიოშიც. გამოძიებას რაც შეეხება, მიუხედავად იმისა, რომ ყველანაირად სცადეს დაემალათ ფაქტები, რაც გამოძიებას შესაძლებელს გახდიდა, საბოლოოდ არაფერია შეუძლებელი. ყველაფერი ნათელია ისედაც, უბრალოდ საკითხი არის შემდეგი – როდის დადგება დღე, როდესაც დამნაშავეები პასუხს აგებენ. დარწმუნებული უნდა ვიყოთ, რომ ეს დღე აუცილებლად დადგება, ამაში ისევ საერთაშორისო საზოგადოება იტყვის თავის სიტყვას”, – განაცხადა სოზარ სუბარმა.