ნარკოდანაშაულში მსჯავრდებულ მსახიობს, გიორგი გიორგანაშვილს, იგივე ბახალას, დღეს ორგანიზებული ნარკოდანაშაულისთვის ბრალს წარუდგენენ. ამ წუთებში მასთან გლდანის #8 დაწესებულებაში შესახვედრად, მისი ადვოკატი, გიორგი მახარაძე მიემართება.
„გლდანის მე-8 საპრობილეში მივდივარ, ბრალის წარდგენის პროცედურას უნდა დავესწრო. ბრიფინგის შემდეგ შაბათ-კვირა დაემთხვა, რის გამოც, მასთან შეხვედრა ვერ მოვახერხე. ვნახოთ, პროკურატურა ახალს რას გადმოგვცემს. ამის შემდეგ შემეძლება საქმის ირგვლივ დეტალურად გესაუბროთ“, - განუცხადა „ჯი-ეიჩ-ენს“ გიორგი მახარაძემ.
რაც შეეხება იმ ფაქტს, იცის თუ არა, გიორგანაშვილმა, რომ მას ბრალს დაუმძიმებენ, როგორც ადვოკატი აღნიშნავს, სავარაუდოდ, მისთვის ეს ცნობილი იქნება.
„ჩვენს შორის კომუნიკაცია არ შემდგარა, მაგრამ ტელევიზიით რაც გაჟღედა, ცხადია, ეცოდინება, ტელევიზორი აქვს და ახალ ამბებს უყურებს“, - აცხადებს მახარაძე.
„ბახალას“ ორგანიზებულ ნარკოდანაშაულს კატასტროფის მედიცინის ცენტრის დირექტორის მოვალეობის ყოფილ შემსრულებელთან, ირაკლი ქორიძესთან ერთად ედავებიან.
ცნობისთვის, რამდენიმე დღის წინ, შსს-ში გამართულ ბრიფინგზე ცნობილი გახდა, რომ გასულ წელს, თურქეთიდან რეანომობილით უკანონოდ დაახლოებით, 900 აბი ნარკოტიკული საშუალების შემოტანის საქმის ორგანიზატორი, ირაკლი ქორიძე დააკავეს. ის წარდგენილ ბრალს არ ეთანხმება და აცხადებს, რომ დანაშაული არ ჩაუდენია.
ქორიძის წინასასამართლო სხდომა 21 მაისს ჩაინიშნა.
რაც შეეხება „ბახალას“, მან სააპელაციოში თბილისის საქალაქო სასამართლოს გამამტყუნებელი განაჩენი გაასაჩივრა, რომლის მიხედვითაც მას 8 წლით თავისუფლების აღკვეთა მიესჯა. პროცესი 10 აპრილს, 15:00 საათზეა ჩანიშნული.
დაცვის მხარე მიიჩნევს, რომ თბილისის საქალაქო სასამართლოს მოსამართლემ აღნიშნული განაჩენი ვერ დაასაბუთა.
გიორგი გიორგანაშვილი გასული წლის 25 იანვარს დააკავეს. სასამართლომ ის 14 ივლისს 20 000-ლარიანი გირაოს სანაცვლოდ გაათავისუფლა.
23 იანვარს კი, ის პირდაპირ სასამართლოს დარბაზშივე დააკავეს, მოსამართლემ გიორგანაშვილს რვა წლით თავისუფლების აღკვეთა მიუსაჯა. გამოძიება მას განსაკუთრებით დიდი ოდენობით ნარკოტიკული საშუალების, „ბუპრენორფინის“ შემცველი 45 აბის და 4 აბის ნატეხის პირადი მოხმარების მიზნით შეძენა-შენახვას ედავებოდა.
