მსახიობ გიორგი გიორგანაშვილს, იგივე ბახალას და კატასტროფის მედიცინის ცენტრის დირექტორის მოვალეობის ყოფილ შემსრულებელს, ირაკლი ქორიძეს ორგზანიზებული ნარკოდანაშაულისთვის ბრალს დღეს, დღის მეორენახევარში წარდუგენენ. აღნიშნული ინფორმაცია „ჯი-ეიჩ-ენს“ ქორიძის ადვოკატმა, სალომე ჯანიაშვილმა დაუდასტურა.
როგორც ადვოკატი განმარტავს, მისი დაცვის ქვეშ მყოფი ბრალს არ აღიარებს და მის დაკავებას საქმეში ფიგურანტ, უკვე მსჯავრდებულ ჯაბა ხულორდავას უკავშირებს.
„რა თქმა უნდა, ბრალს არ აღიარებს, საქმის მასალები გადმოგვეცა, გავეცნით და მიგვაჩნია, რომ ის დაუსაბუთებელია. ჩემი დაცვის ქვეშ მყოფს უკანონო ქმედება არაფერი ჩაუდენია. ის მის დაკავებას ჯაბა ხულორდავას პირად ინტერესს უკავშირებს, მან ამით თავისი სამართლებრივი მდგომარეობა შეიმსუბუქა. ორი უვადო მუხლით ედბოდა ბრალი, საერთო ჯამში კი, 7 წლით თავისუფლების აღკვეთა მიიღო გარკვეული ინფორმაციის, თანამშრომლობის სანაცვლოდ. ინფორმაციას სთხოვდნენ გიორგი გიორგანაშვილსაც, რაც მისმა დამცველმაც დაადასტურა. ეს არის ჯაბა ხულორდავას ჩვენებაზე აგებული საქმე, რომელსაც სასამართლო პერსპექტივა არ აქვს“, - აცხადებს ჯანიაშვილი.
ცნობისთვის, გუშინ, შსს-ში გამართულ ბრიფინგზე ცნობილი გახდა, რომ გასულ წელს, თურქეთიდან რეანომობილით უკანონოდ დაახლოებით, 900 აბი ნარკოტიკული საშუალების შემოტანის საქმის ორგანიზატორი, ირაკლი ქორიძე დააკავეს.
ის ცნობილი ექიმების ოჯახის წვერია. შსს-ს ინფორმაციით, ქორიძემ საზღავრზე განსაკუთრებით დიდი ოდენობით ნარკოტიკული საშალების უკანონოდ გადმოსატანად გეგმა წინასწარ შეიმუშავა. 2017 წლის იანვარში, როცა ნარკოტიკული საშუალების შემოტანა მოხდა, ქორიძე კატასტროფის მედიცინის ცენტრის დირექტორის მოვალეობას ასრულებდა. გამოძიების მტკიცებით, ამ პერიოდში ირაკლი ქორიძემ ხელოვნურად შექმნა სიტუაცია, რომ რეანიმობილი თბილისიდან თურქეთის ქალაქ ტრაპზონში გაეშვა.
გიორგი გიორგანაშვილი გასული წლის 25 იანვარს დააკავეს. სასამართლომ ის 14 ივლისს 20 000-ლარიანი გირაოს სანაცვლოდ გაათავისუფლა.
23 იანვარს კი, ის პირდაპირ სასამართლოს დარბაზშივე დააკავეს, მოსამართლემ გიორგანაშვილს რვა წლით თავისუფლების აღკვეთა მიუსაჯა. გამოძიება მას განსაკუთრებით დიდი ოდენობით ნარკოტიკული საშუალების, „ბუპრენორფინის“ შემცველი 45 აბის და 4 აბის ნატეხის პირადი მოხმარების მიზნით შეძენა-შენახვას ედავებოდა.
"ბახალას" საქალაქო სასამართლოს განაჩენი სააპელაციო სასამართლოში აქვს გასაჩივრებული, სადაც სხდომა 10 აპრილს, 15:00 საათზეა ჩანიშნული.
