“საქართველოს ახალგაზრდა იურისტთა ასოციაციის” ხელმძღვანელის, სულხან სალაძის შეფასებით, ხელისუფლების თუ ოპოზიციის მხრიდან, უცენზურო და სალანძღავი სიტყვები, არის აბსოლუტურად მიუღებელი.
მისივე განცხადებით, სასურველია მსგავსი ფორმატის შეხვედრებზე ძირითადი აქცენტები გადატანილი არ იყოს ლანძღვასა და შეურაცხყოფაზე.
“ვისურვებდი, მეტი საგნობრივი დისკუსია ყოფილიყო, აქცენტები ყოფილიყო პრობლემებზე და ცხადია, ის განცხადებები, რაც მოვისმინეთ, ხელისუფლების თუ ოპოზიციის მხრიდან, მათ შორის უცენზურო და სალანძღავი სიტყვები, არის აბსოლუტურად მიუღებელი. ამ ფონზე იშვიათი გამონაკლისი იყო შს მინისტრობის კანდიდატის განცხადებები, რომელიც ორიენტირებული იყო პრობლემებსა და გამოწვევებზე, მათ შორის ოჯახში ძალადობის საკითხებსა თუ არასრულწლოვანთა პრობლემებზე. ვისურვებდი, მეტი საგნობრივი დისკუსია ყოფილიყოს ამ ფორმატში და ნაკლებად ჰქონოდეს მედიას და საზოგადოებას განცდა, რომ ძირითადი აქცენტები გადატანილია ისეთ მოვლენებზე, რომელიც ლანძღვასა და ერთმანეთის შეურაცხყოფისკენ იქნება მიმართული.
როგორც ვიცი, პრემიერ მინისტრმა მომხდარის გამო გუშინ ბოდიში მოიხადა”, - განაცხადა სულხან სალაძემ.
შეგახსენებთ, პრემიერ-მინისტრობის კანდიდატ გიორგი კვირიკაშვილსა და „ნაციონალური მოძრაობის“ ერთ-ერთ ლიდერ ნიკა მელიას შორის დაპირისპირება მოხდა.
სხდომაზე ნიკა მელიას მიმართვას გიორგი კვირიკაშვილის გაღიზიანება მოჰყვა და მან „ნაციონალური მოძრაობის“ დეპუტატს უცენზურო სიტყვებით მიმართა.
ამის შემდეგ მთავრობის წევრობის კანდიდატებმა სხდომათა დარბაზი დატოვეს.
მთავრობამ დარბაზი პროტესტის ნიშნად დატოვა.
მოგვიანებით, საქართველოს პრემიერ-მინისტრმა მომხდარი ინციდენტის გამო საზოგადოებას ბოდიში მოუხადა და განაცხადა, სამწუხაროდ, „ნაციონალური მოძრაობის“ ზოგიერთმა წარმომადგენელმა მისი მდგომარეობიდან გამოყვანა შეძლო. ეკა ბესელია მთავრობის დამტკიცება
