თბილისის სააპელაციო სასამართლომ დეკანოზ გიორგი მამალაძის უფლებადამცველების შუამდგომლობა, სასამართლოში განმარტებები მიეცა პროფესორ ნონა თოდუას, არ დააკმაყოფილა, თუმცა მის მიერ მომზადებულ „სასამართლოს მეგობრის“, როგორც დოკუმენტაციის გამოყენების უფლება, დაცვის მხარეს მისცა. სასამართლომ, ასევე, არ დააკმაყოფილა სახალხო დამცველის მონიტორინგის შედეგების საქმეზე დართვის შუამდგომლობა, მაგრამ დაცვის მხარეს, როგორც დასკვნით, ისე შესავალ სიტყვაში, მისი გამოყენების ნება დართო.
დეკანოზ მამალაძის ადვოკატის, გიორგი ფანცულაიას განცხადებით, დეკანოზი გიორგი მამალაძე არა თუ ანგარებით ამზადებდა მკვლელობას, არამედ, მის მიმართ უნდა დადგეს გამამართლებელი განაჩენი, რადგან საქმეში არანაირი მტკიცებულება არ არსებობს.
"ბრალდების მხარე ითხოვს, რომ საქმეში კვლავ დაბრუნდეს მოტივი მკვლელობის მომზადება, ანგარებით. წარმოიდგინეთ, ბრალდების მხარე იმის დაშვებას ითხოვს, რაც საქალაქო სასამართლოში თვით მიკერძოებულმა მოსამართლემ, ბესიკ ბუგიანიშვილმა არ დააკმაყოფილა. ჩვენი შესავალი სიტყვა იყო აგებული იმაზე, რომ დეკანოზი გიორგი მამალაძე არა თუ ანგარებით ამზადებდა მკვლელობას, არამედ, მის მიმართ დადგეს გამამართლებელი განაჩენი, რადგან საქმეში არანაირი მტკიცებულება არ არსებობს. სწორედ ამიტომ გვინდოდა, სასამართლო სხდომები ღია ყოფილიყო, რათა საზოგადოებას დაენახა, რომ გიორგი მამალაძე არავის მოკვლას არ ამზადებდა", - განაცხადა გიორგი ფანცულაიამ.