„დაცვის მხარეს რამდენიმე შუამდგომლობა გვექნება, აქედან გამოვყოფდი სახალხო დამცველის დასკვნას“,- ამის შესახებ ე.წ ციანიდის საქმეზე ბრალდებული დეკანოზ გიორგი მამალაძის ადვოკატმა, გიორგი ფანცულაიამ დღევანდელი პროცესის დაწყებამდე ჟურნალისტებს განუცხადა.
ადვოკატის შეფასებით, ომბუდსმენის დასკვნა საზოგადოებისთვის მნიშვნელოვანია, თუმცა ამას, პირველ რიგში, სამართლებრივი შეფასება სასამართლოში უნდა მიეცეს.
„აუცილებელი და მნიშვნელოვანია ეს მტკიცებულება საქმის მასალას დაერთოს. ამას გარდა, ერთ-ერთი ძალიან მნიშვნელოვანი მოწმის დაკითხვის შუამდგომლობა გვექნება. თუ ვისზეა საუბარი ამას სასამართლო პროცესზე გავაჟღერებთ. შემდეგ კი ბრალდების მხარე შესავალი სიტყვით წარდგება, სავარაუდოდ, დაცვის მხარე შესავალი სიტყვის წარმოთქმას დღეს ვერ მოვასწრებთ“, - განაცხადა ადვოკატმა.
რაც შეეხება შეკითხვას, დეკანოზი მამალაძე მხოლოდ დღევანდელ პროცესს არ დაესწრება თუ სხვა პროცესებსაც, გიორგი ფანცულაიამ უპასუხა, რომ ბრალდებულის ამჟამინდელი პოზიციით, ის მომავალ პროცესებზეც არ აპირებს დასწრებას.
„მსჯავრდებული მამალაძე პროცესს არ დაესწრება. მან წინა სასამართლო პროტესტის ნიშნად დატოვა. ეს იყო ერთგვარი უნდობლობის გამოხატვა იმ მოქმედების მიმართ, რომელიც სასამართლო სხდომის დახურვას ეხებოდა. ჩვენ უკმაყოფილონი ვიყავით, როცა საქალაქო სასამართლოში პროცესები დაიხურა და სწორედ ამ დახურულმა სასამართლომ გადაწყვიტა განაჩენის ბედი. იგივე გაიმეორა ამ საქმესთან დაკავშირებით სააპელაციო სასამართლომაც, შესაბამისად, სხდომის დატოვება დეკანოზის მხრიდან, პროტესტის ერთგვარი ჟესტი იყო. აქვე ვიტყვი, რომ სააპელაციო სასამართლოს ახლაც აქვს შესაძლებლობა შეცვალოს გადაწყვეტილება, ეს დეკანოზს ნდობას გაუჩენს, რათა დაბრუნდეს სასამართლო სხდომებზე“, - აღნიშნა ფანცულაიამ.
შეგახსენებთ, თბილისის საქალაქო სასამართლომ დეკანოზ გიორგი მამალაძეს 5 სექტემბერს 9 წლით თავისუფლების აღკვეთა მიუსაჯა.
