„ის, რომ ჩემი დაცვის ქვეშ მყოფის მიმართ არსებობს ფარული საგამოძიებო მოქმედებების შედეგად მოპოვებული ინფორმაცია, სიმართლეს არ შეესაბამება. ასეთი მტკიცებულება ჩვენთვის არ გადმოუციათ და არც საქმეში მოიპოვება“, - განუცხადა „ჯი-ეიჩ-ენს“ ხორავას ქუჩაზე მოზარდების მკვლელობის საქმეზე ერთ-ერთი ბრალდებულის, გ.ჯ.-ს ადვოკატმა, ტარიელ კაკაბაძემ.
ადვოკატი ასევე არ ადასტურებს გავრცელებულ ინფორმაციას, რომ არასრულწლოვანმა დანაშაული აღიარა.
„კატეგორიულად ვაცხადებ, ეს სიმართლეს არ შეესაბამება. საქმეში გამოკითხვის ოქმი არ მოიპოვება, ჩემი დაცვის ქვეშ მყოფს საგამოძიებო ორგანოსთვის ჩვენება არ მიუცია, შესაბამისად, დანაშაულის აღიარებაზე საუბარი ზედმეტია“, - აღნიშნავს კაკაბაძე.
მისივე განმარტებით, ბრალდებული დეტალურ ჩვენებას სასამართლოში მისცემს და მზად არის ყველა კრიტიკულ კითხვას მოსამართლის თანდასწრებით უპასუხოს.
„საქმეზე უტყუარი ჭეშმარიტების დასადგენად, გადავწყვიტეთ, რომ ჩვენება სასამართლოს მივცეთ და ვუპასუხოთ დასმულ ყველა კრიტიკულ კითხვას. რადგან საქმე ძალიან სენსიტიური, რეზონანსული და სამართლებრივად საინტერესოა, ვვარაუდობ, რომ მოსამართლეს დამატებით კითხვები აუცილებლად ექნება, ჩვენ მზად ვართ ამ კითხვებსაც ვუპასუხოთ“, - აცხადებს კაკაბაძე.
ის არ აკონკრეტებს თუ რა გარემოებები იკვეთება ამ მომენტისათვის მისი დაცვის ქვეშ მყოფის ბრალდების ირგვლივ.
„დაცვის სტრატეგიიდან და ინტერესებიდან გამომდინარე, ასევე იმ სურვილიდან გამომდინარე, რომ საზოგადოებამ, დაზარალებულის ოჯახმა საქმესთან დაკავშირებით სრულყოფილი ჭეშმარიტება გაიგოს, არ მსურს ისეთი განცხადების გაკეთება, რომელმაც შესაძლოა რამეს ხელი შეუშალოს. ვფიქრობ, ბევრი რამ გამოაშკარავდება და ბევრ დეტალს მოეფინება ნათელი“, - აცხადებს კაკაბაძე.
წინასასამართლო სხდომა თბილისის საქალაქო სასამართლოში 9 იანვარსაა ჩანიშნული.
შეგახსენებთ, რომ ქორავას ქუჩაზე პირველ დეკემბერს მოზარდებს შორის დაპირისპირება მოხდა, რომლის შედეგადაც ერთი მოზარდი ადგილზე გარდაიცვალა, მეორე კი საავადმყოფოში.
სამართალდამცავებმა 2 დეკემბერს მკვლელობაშ ბრალდებული ერთი არასრულწლოვანი დააკავეს. განზრახ მკვლელობაში კიდევ ერთ არასრუწლოვან ბრალდებულს ბრალი დაუსწრებლად წარედგინა. ის საგამოძიებო უწყებაში 4 დეკემბერს გამოცხადდა.