თბილისის საქალაქო სასამართლოში, ბუტა რობაქიძის მკვლელობის საქმეზე, მაშინდელი პატრულ-ინსპექტორი, ბესიკ კოტორაშვილი დაიკითხა. ის დასმული კითხვების უმრავლესობაზე პასუხობდა, რომ არ ახსოვდა, რადგან შემთხვევიდან დიდი დრო იყო გასული.
საქმეზე ერთ-ერთ ერთი ბრალდებულის, გურამ დონაძის ადვოკატის, მალხაზ ველიჯანიშვილის შეფასებით, მოწმემ ჩვენებაზე უარი განაცხადა , რადგან ყველა კითხვაზე პასუხობდა, რომ არ ახსოვდა.
"ყველაზე მთავარი, ისეთ კითხვაზე, მაგალითად სურათზე ნამდვილად თვითონ იყო თუ არა, მან უპასუხა, რომ არ ახსოვს. შეუძლებელია, ამ კითხვაზე ასეთი პასუხი გასცე, ან ხარ ან არ ხარ, ან ამსგავსებ ან ვერ ამსგავსებ. მას ასევე ვკითხეთ, ჰქონდა თუ არა შესაბამისი განათლება, რომ შეეფასებინა, ადამიანი გარდაცვლილი იყო თუ არა, რაზეც მან გვიპასუხა, რომ არ ახსოვს. განათლება ან გაქვს ან არ გაქვს, როგორ შეიძლება არ გახსოვდეს"?- განაცხადა ადვოკატმა.
მისივე თქმით, ეს ადამიანი არის მოწმე, ნახა შემთხვევის ადგილი და რეალობა, მაგრამ ამის თქმა არ შეუძლია, რადგან სტრესის და ზეწოლის ქვეშ არის, სწორედ იმ ადამიანის მხრიდან ვინც ის გამოძიებაში დაკითხა.
"მის გვერდით ყვირიან, რომ იარაღია, ის ამბობს ფრაზებს დაგხოცავთ, ჩვენი მოკვლა გინდოდათო და ამის მერე ამბობს, რომ იარაღი არ უნახავს? ეს არის გამაოგნებელი და მიუთითებს იმაზე, რომ მოწმე ნამდვილად იტყუება და ფაქტებს მალავს. მოწმე ბრალდების მხრიდან წნეხის ქვეშაა და სიმართლეს ვერ ამბობს. კადრებში ნამდვილად თვითონ არის, პროკურორმაც კი დაუდასტურა, რომ ნამდვილად ის არის კადრებში. ამ მოწმეს არ აქვს პასუხი კითხვაზე თუ რატომ ამბობს დაგხოცავთო. ამას რომ ამბობს ფაქტია და ის თავზე ადგას გარდაცვლილ რობაქიძეს. რადგან ამაზე პასუხი არ აქვს, ამიტომაც, ამბობს, რომ არ ახსოვს", - განაცხადა გურამ დონაძის ადვოკატმა.
ამ წუთებში პროცესზე ჩვენებას გადაცემა "ვიდეოპატრულის" ოპერატორი აძლევს.