მიხეილ სააკაშვილი ლუგანსკის პოლიციის ყოფილი ხელმძღვანელის სახლში დააკავეს, - ამის შესახებ, „hromadske.ua“-ს ინფორმაციით, პოლიციის ყოფილმა მაღალჩინოსანმა მიმართვა გაავრცელა.
„დღეს ჩემს ბინაში დააკავეს მიხეილ სააკაშვილი. ყველაფერი რაც დღეს მოხდა, ერთის მხრივ იყო მოსალოდნელიც და ამავდროულად მოულოდნელიც.
მოსალოდნელი იმის გამო, რომ მე როგორც პოლიციის თანამშრომელს, კარგად მესმის, რომ ჩვენს წინააღმდეგ მუშაობენ უკრაინის სპეცსამსახურები და ასევე სპეცსამსახურები იმ სახელმწიფოების, რომლებიც უკრაინის წინააღმდეგ იბრძვიან, ესაა რუსეთი.
კანონის თანახმად, იზოლატორში უნდა გადავეყვანე მეც, მაგრამ მე არ დამაკავეს. ვვარაუდობ, რომ სურთ, მახე დამიგონ და სააკაშვილის დაკავებაში დამნაშავე გამომიყვანონ.
შემიძლია გითხრათ ერთი, მე ჩავატარებ საკუთარ გამოძიებას ამასთან დაკავშირებით. თუ უახლოეს დღეებში მე რამე დამემართება, ეს ნიშნავს, რომ სწორ კვალზე გავედი,"-აცხადებს იური პაკინბოროდა.
უკრაინის პროკურატურა მიხეილ სააკაშვილისთვის აღმკვეთის ღონისძიების სახით ელექტრონული სამაჯურით შინაპატიმრობას ითხოვს. სააკაშვილი დაკავებულია სისხლის სამართლის კოდექსის 256-ე მუხლის საფუძველზე, რაც გულისხმობს ორგანიზებული დანაშაულებრივი დაჯგუფებისთვის ხელშეწყობას.
მიხეილ სააკაშვილი გუშინ კიევში, ერთ-ერთ ქუჩაზე საცხოვრებელ ბინაში დააკავეს. ის ამჟამად წინასწარი დაკავების იზოლატორშია გადაყვანილი. მიხეილ სააკაშვილს 72 საათის განმავლობაში აღკვეთის ღონისძიებას შეუფარდებენ.
