“ერთიანი ნაციონალური მოძრაობა“ ბიძინა ივანიშვილის ოჯახის წევრს პოლიციელების ღირსების შელახვაში ადანაშაულებს.
როგორც დღეს გამართულ ბრიფინგზე პარტიის წარმომადგენელმა ნუგზარ წიკლაურმა განაცხადა, ბერა ივანიშვილის მოთხოვნით, პოლიციის 9 თანამშრომელი სამსახურიდან გაათავისუფლეს.
"შარდენზე, ერთ-ერთ კლუბში მომხდარი ჩხუბის დროს, კლუბის დაცვის წევრი დააკავეს, რომლის გათავისუფლებაც გენერალურმა ინსპექციამ ბერა ივანიშვილის დავალებით პოლიციას მოსთხოვა. თუმცა, ეს მოთხოვნა არ დაკმაყოფილდა, რასაც მინისტრის მხრიდან გენერალური ინსპექციის თანამშრომელთა გათავისუფლება მოჰყვა.
პოლიციელთა ღირსების შელახვა, მათი აბუჩად აგდება - შეგახსენებთ რა სიტყვები იქნა გამოყენებული შინაგან საქმეთა მინისტრის მხრიდან პოლიციელების მიმართ, როდესაც მან თავის თანამშრომლებს "ბალასტი" უწოდა, ანგრევს ქართულ სახელმწიფოს.
ამიტომ ერთიანი ნაციონალური მოძრაობა ყოველთვის და ყველგან დაცავს ქართული პოლიციის ღირსებას, ქართველი პოლიციელების უფლებებს," - განაცხადა ნუგზარ წიკლაურმა.
