საკონსტიტუციო სასამართლოს მოსამართლეობის კანდიდატ მანანა კობახიძის განცხადებით, თუ ვინმე კიდევ გასწევს ბიძინა ივანიშვილის მსგავს ქველმოქმედებას, მასაც უწოდებს ისეთი დონის საზოგადო მოღვაწეს, როგორადაც შეიძლება ილია ჭავჭავაძეს განიხილავდნენ.
ამის შესახებ კობახიძემ პარლამენტის იურიდიულ საკითხთა კომიტეტის სხდომაზე, დეპუტატ ირმა ნადირაშვილის კითხვის საპასუხოდ განაცხადა. „ევროპული საქართველოს“ წევრი მიიჩნევს, რომ მანანა კობახიძის დამოუკიდებლობაზე საუბარი სასაცილოა. ნადირაშვილი დაინტერესდა, საკონსტიტუციო სასამართლო თუ ასეთი წარმატებული იყო, მის დასამარებაში კობახიძემ დიდი წვლილი რატომ მიიღო.
"თქვენ საკონსტიტუციო სასამართლოს წევრად თუ დაინიშნეით, სადაც „რუსთავი 2"-ს საქმის განხილვა მოგიწევთ, თქვენს დამოუკიდებლობაზე საუბარი სასაცილოა. ასევე მაინტერესებს, ივანიშვილი ისეთივე საზოგადოებრივი მოღვაწეა, როგორც ილია ჭავჭავაძე?", - მიმართა ნადირაშვილმა კობახიძეს.
„ილია ჭავჭავაძეს რაც შეეხება, თუ კიდევ ვინმე ამ ქვეყანაში ასეულობით კულტურული მემკვიდრეობის ძეგლს, ისტორიულ ძეგლებს აღადგენს, აფინანსებს უნივერსიტეტებს, აშენებს სკოლებს, ფიზიკურად გადაარჩენს მეცნიერებს, ხელოვან ხალხს, აღადგენს თეატრებს, მე იმასაც ვუწოდებ ისეთი დონის საზოგადო მოღვაწეს, როგორადაც შეიძლება განიხილავდნენ ილია ჭავჭავაძეს“, - განაცხადა კობახიძემ.
რაც შეეხება რუსთავი 2“-ის საქმეს, კობახიძის თქმით, ამ საქმეს არ იცნობს. ხოლო ამ საქმის ფარგლებში საკონსტიტუციო სასამართლოს გადაწყვეტილებას ნორმის შეჩერებასთან დაკავშირებით, მისი თქმით, კრიტიკა ეხებოდა პროცედურულ დარღვევებს.
"ნორმის შეჩერებაზე იმსჯელა ისე საკონსტიტუციო სასამართლომ, რომ არ მოუსმინა პარლამენტის წარმომადგენელს და გადაწყვეტილება მიიღო ზეპირი მოსმენის გარეშე. ჩემი კრიტიკა ეხებოდა პროცედურულ საკითხებს", - განაცხადა კობახიძემ.
პარლამენტის იურიდიულ საკითხთა კომიტეტის სხდომაზე საკონსტიტუციო სასამართლოს წევრობის კანდიდატს მანანა კობახიძეს უსმენენ.
