სახალხო დამცველი უჩა ნანუაშვილი ,,რუსთავი 2“-ის საქმის მოსამართლეებზე შესაძლო ზეწოლის ფაქტს ეხმაურება და ამბობს, რომ ამ ფაქტთან დაკავშირებით, გამოძიების ჩატარება მნიშვნელოვანია.
უჩა ნანუაშვილის თქმით, არსებობს "საკმარისი შესაძლებლობა" იმისთვის, რომ ეს ფაქტები გადამოწმდეს, რადგან 13 ივლისის სტიქიით დაზარალებულთა სია ცნობილია.
,,ბოლო დღეებში არაერთი ინფორმაცია გავრცელდა, მათ შორის, მედიითაც, რომელიც მოსამართლეებთან დაკავშირებულ გარკვეულ ინფორმაციას ეხება. მე ვფიქრობ, სავსებით არის საკმარისი შესაძლებლობა იმის, რომ მოხდეს გადამოწმება, რამდენად მოხდა, თუნდაც კონკრეტულად, როდესაც საუბარია ერთ-ერთ მოსამართლეზე, რომელიც რუსთავი 2-ის საქმეს იხილავს, რამდენად მოხდა რეალურად იმ კომპენსაციის წესების დაცვა, რომელიც არის საჯარო. დაზარალებულთა სია ცნობილია და გადამოწმების ყოველგვარი საფუძველი არსებობს და აქედან გამომდინარე, ალბათ, უახლოეს დღეებში ჩვენ უნდა ველოდოთ ამომწურავ ინფორმაციას ხელისუფლების წარმომადგენლების მხრიდან, რომ ამ საქმეზე გამოირიცხოს კითხვის ნიშნები, რომლებიც ამ ეტაპზე, რა თქმა უნდა, არსებობს", - ამბობს ომბუდსმენი.
ნანუაშვილის თქმით, გამომდინარე საზოგადოების მაღალი ინტერესისა, მნიშვნელოვანია გამოძიების დეტალების გასაჯაროება.
ტელეკომპანია ”რუსთავი 2”-ის ინფორმაციით, სააპელაციო სასამართლოში, ”რუსთავი 2”-ის საქმის განმხილველი კოლეგიის თავმჯდომარის, მოსამართლე ნატა ნაზღაიძის ძმას, ზვიად ნაზღაიძეს თბილისის მერიამ სახელმწიფოს კუთვნილი 1 მილიონი ლარის ქონება გადასცა.