„პირიმზესთან“ მომხდარი აფეთქების შედეგად კლინიკაში გადაყვანია 69 წლის ქალბატონი, რომელსაც ქალა-ტვინის ტრავმა აქვს მიღებული, - განაცხადა ამტელ ჰოსპიტალის“ დირექტორმა, ლაშა მაჭარაშვილამა
„მოყვანილია 69 წლის ქალბატონი, გვარად სურმავა. როგორც ჩვენთვის ცნობილია ის არის გარემოვაჭრე. ეს ქალბატონი აფეთქების შედეგად დაეცა და მიიღო ქალა-ტვინის ტრავმა. გაკეთდა კომპიუტერული ტომოგრაფია. ქალას შიდა დაზიანებები არ აღენიშნება, არც გემატომა. აღენიშნება ნაფლეთოვანი ჭრილობები და ბიოქსოვილების გემატომა. ამჟამად უტარდება ჭრილობების ქირურგიული დამუშავება და მისი მდგომარეობა სტაბილურია. მის სიცოცხლეს საფრთხე არ ემუქრება, თუმცა პაციენტი ხვალამდე დარჩება სტაციონარში”’- განაცხადა ლაშა მაჭარაშვილმა.
შეგახსენებთ, რომ 4 ოქტომბერს, თბილისში, ბარათაშილის ხიდთან დეპუტატ გივი თარგამაძის ავტომობილი ააფეთქეს. სხეულის მძიმე დაზიანებები სამმა ადამიანმა მიიღო, ისინი საავადმყოფოში არიან გადაყვანილები. თავად დეპუტატს და მის მძღოლს მძიმე დაზიანებები არ მიუღიათ. აფეთქების შედეგად დაშავებული ერთ-ერთი მოქალაქე ინგოროყვას კლინიკაშია გადაყვანილი. როგორც კლინიკაში აცხადებენ, მისი მდგომარეობა უკიდურესად მძიმეა.
შს მინისტრის პირველი მოადგილის, ბესიკ ამირანაშვილის, განცხადებით, უწყებამ გამოძიება სსკ-ის 109-ე მუხლით დაიწყო, რაც გულისხმობს განზრახ მკვლელობას დამამძიმებელ გარემოებებში.
„ამ ეტაპზე მომხდარის კონკრეტულ დეტალებზე ვერ ვისაუბრებ, მაგრამ გამოძიება დაიწყო შინაგან საქმეთა სამინისტრომ სისხლის სამართლის კოდექსის 109-ე მუხლით, რაც გულისხმობს განზრახ მკვლელობას დამამძიმებელ გარემოებებში. შემთხვევის ადგილზე მუშაობს ექსპერტ-კრიმინალისტების ჯგუფი. ტარდება ყველა პირველადი საგამოძიებო მოქმედება და უახლოეს პერიოდში ვეცდებით, რომ საქმეზე დავადგინოთ ჭეშმარიტება,“ - აცხადებს ბესიკ ამირანაშვილი.
