კიევში 23 სექტემბრის დილით რუსეთის იერიშის შედეგად ქალაქის რამდენიმე რაიონში ხანძარი გაჩნდა.
კიევის მერის, ვიტალი კლიჩკოს განცხადებით, სოლომიანსკის რაიონში ნამსხვრევები საცხოვრებელი სახლების მიმდებარე ტერიტორიაზე ჩაცვივდა. მოგვიანებით მან განაცხადა, რომ წინასწარი ინფორმაციით, იერიშის შედეგად სატრანსპორტო საწარმოს ტერიტორიაზე ხანძარი გაჩნდა.
გოლოსიივსკის რაიონში ხანძარი საწყობებში გაჩნდა. ამასთან, კლიჩკოს ინფორმაციით, დრონი ბენზინგასამართ სადგურსაც დაეჯახა.
კიევის მიმართულებით საჰაერო იერიში 22 სექტემბრის საღამოს დაიწყო და 23 სექტემბრის დილასაც გაგრძელდა.
წინა საღამოს კიევში რუსეთის თავდასხმის შედეგად დაზიანებები და ხანძრები რამდენიმე რაიონში დაფიქსირდა. ქალაქის ხელისუფლების ინფორმაციით, დაშავდა რვა ადამიანი, მათგან სამი საავადმყოფოში გადაიყვანეს.
