უკრაინის პრეზიდენტმა ვოლოდიმირ ზელენსკიმ დონალდ ტრამპთან მოლაპარაკებების შემდეგ გამართულ პრესკონფერენციაზე განაცხადა, რომ მზად არის, რუსეთის პრეზიდენტ ვლადიმირ პუტინს ნებისმიერ დროს შეხვდეს.
ზელენსკის თქმით, აშშ-ის პრეზიდენტ დონალდ ტრამპს შეუძლია, უკრაინისა და რუსეთის ლიდერებს შორის სამმხრივი შეხვედრის ორგანიზებაში დაეხმაროს.
„ყველაზე მნიშვნელოვანი, რისი გაკეთებაც პრეზიდენტ ტრამპს შეუძლია, მათ შორის იმ საკითხებთან დაკავშირებით, რომლებიც დღეს მანამდე დავაყენე, არის სამმხრივი შეხვედრის ორგანიზება, რომელზეც ქვეყნების ლიდერები ყველა მწვავე საკითხს განიხილავენ“, - განაცხადა ზელენსკიმ.
კითხვაზე, ნიშნავს თუ არა ეს, რომ მზად არის პუტინთან შესახვედრად, ზელენსკიმ უპასუხა: „დიახ, მზად ვარ, პუტინს ნებისმიერ დროს შევხვდე. ვფიქრობ, ყველამ რაც შეიძლება სწრაფად უნდა ვიმოქმედოთ“ ომის დასრულების მიმართულებით.
ამასთან, ზელენსკიმ გააკრიტიკა მიდგომა, რომლის ფარგლებშიც ომის დასრულებაზე საუბრობენ, თუმცა ამისთვის კონკრეტულ ნაბიჯებს არ დგამენ.
„თუ ამბობთ, რომ ომი დიალოგის გზით უნდა დასრულდეს, ეს ნიშნავს, რომ უნდა შევხვდეთ და ვისაუბროთ“, - განაცხადა ზელენსკიმ და აღნიშნა, რომ ეს „სიძულვილის“ მიუხედავად უნდა გაკეთდეს.
