ვაკის რაიონის გამგეობის ორგანიზებით, ამხანაგობების თავმჯდომარეებისთვის ორდღიანი ტრენინგი ჩატარდა. პირველ დღეს ამხანაგობების წარმომადგენლებს საბურთალოს რაიონის გამგებელმა, ბექა მიქაუტაძემ პროექტი „მართე შენი ქალაქი“ გააცნო. ტრენინგის მეორე დღეს კი სემინარი თვითმმართველობის სისტემის შესახებ GIPA-ს წარმომადგენლებმა ჩაატარეს. ვაკის რაიონის გამგებლის, ნოდარ ტურძელაძის განცხადებით, ტრენინგების ჩატარება მნიშვნელოვანია როგორც ვაკის რაიონის, ასევე სხვა რაიონების ამხანაგობებისთვის მთელი თბილისის მასშტაბით.
„ამ შეხვედრის მიზანია, პირველ რიგში ის, რომ ამხანაგობის თავმჯდომარეებმა იცოდნენ, გამგეობასთან თანამშრომლობით სწრაფ ვადებში როგორ უნდა მოგვარდეს საცხოვრებელ ადგილებში არსებული პრობლემები. მეორე - ის, თუ როგორ უნდა მართონ ამხანაგობები წევრებმა და თავმჯდომარეებმა, რათა სხვადასხვა სახის არსებული პრობლემები ოპერატიულად გადაწყდეს“, - აღნიშნა ნოდარ ტურძელაძემ.
საბურთალოს რაიონის გამგებლის, ბექა მიქაუტაძის თქმით, თავმჯდომარეებმა უნდა გაიაზრონ, რომ ამხანაგობა არის კერძო მესაკუთრეების გაერთიანება, საერთო ქონებას კი სჭირდება მოვლა და პატრონობა. „ამ მოვლა-პატრონობაში თანაბრად უნდა იყოს ჩართული ყველა კერძო მესაკუთრე, რომელიც ამ ამხანაგობის წევრია. რა თქმა უნდა, გამგეობა და მერია, თავის მხრივ, გააგრძელებენ თანადაფინანსებული პროექტების განხორციელებას და სალექციო კურსებს ამხანაგობის შექმნის და მართვის საკითხებზე. მომავალ წელს გვინდა, რომ პროექტი მთელ ქალაქში განხორციელდეს. რა თქმა უნდა, მიმდინარეობისას ყველა კრიტიკული მოსაზრება უნდა იყოს გათვალისწინებული. ამ შეხვედრების მიზანიც ისაა, რომ გავიგოთ ამხანაგობების წარმომადგენლების მოსაზრებები და ხედვები“, - განაცხადა ბექა მიქაუტაძემ. მან ასევე აღნიშნა, რომ შეხვედრების დადებითი მხარე ისაა, რომ ამხანაგობის თავმჯდომარეები ერთმანეთთან კომუნიკაციას ამყარებენ. „ეს ჩვენი დაგეგმილი პროექტის პირველი ეტაპია. პროექტი განხორციელდება ეტაპობრივად, რაც, დაახლოებით რამდენიმე თვეში, მთელ ვაკის რაიონს მოიცავს“.
ტრენინგის დასასრულს ამხანაგობების თავმჯდომარეებს სერტიფიკატები და სამახსოვრო საჩუქრები გადასცეს.
