მეორედ არჩევა ნებისმიერი ხელისუფლებისათვის დიდი გამოცდაა, - აცხადებს „ჯი-ეიჩ-ენისთვის“ მიცემულ ინტერვიუში ფილოსოფოსი ზაზა ფირალიშვილი. მისი თქმით, საინფორმაციო სივრცე უკვე საფუძვლიანად აქვთ დაკავებული ნაციონალურ მოძრაობასა და ქართულ ოცნებას. ყველა ძირითადი ხდომილება მათ ირგვლივ ტრიალებს. სხვამ ვერავინ მოახერხა, ამ სივრცეზე შეჭრილიყო და ადგილი მოეპოვებინა. ამიტომაც, ძნელი წარმოსადგენია, თუ რაიმე განსაკუთრებული არ მოხდა, პოლიტიკური რელიეფი მკვეთრად შეიცვალოს.
„მთავარი მოვლენები არჩევნების შემდეგ გველის. მეორედ არჩევა ნებისმიერი ხელისუფლებისათვის დიდი გამოცდაა. გარდა ამისა, იმედი ვიქონიოთ, რომ ჩვენი პოლიტიკური სპექტრის რაღაც ნაწილი მაინც შეეცდება გათავისუფლდეს იდეოლოგიური სნობიზმისაგან, თვითკმაყოფილებისა და ნარციზიზმისაგან და რაღაც შეცვალოს. უკვე ახლა ვისურვებდი, არჩევნებისათვის საერთო ენა გამოეძებნათ დასავლური ყაიდის პოლიტიკურ ძალებს, მაგრამ ჩვენი პოლიტიკა ჯერაც იმ დონეზეა, როდესაც პოლიტიკოსებს ვერ დაუძლევიათ პირადი მესიანიზმი. განა დასავლელ პოლიტიკოსებს არ ახასიათებთ ეს, მაგრამ გამოცდილება აიძულებთ, რომ საკუთარი თავით არ დათვრნენ. ჩვენში კი ჯერაც ყოველი ლიდერი თუ პოლიტიკური ჯგუფი საკუთარ თავს წარსულში განცდილი წარმატების მწვერვალზე განიხილავს და არ სურს დაინახოს, რომ საზოგადოებრივ განწყობებში ბევრი რამ სწრაფად იცვლება და რომ სიტუაცია მათგან ცვლილებებს მოითხოვს“, - აცხადებს ფირალიშვილი და აღნიშნავს, რომ „ ბედად, იგივე ეხებათ პუტინისტურ პოლიტიკურ ჯგუფებსაც“.
