სოლომონ პავლიაშვილი საგარეჯოს მაჟორიტარად კენჭს დამოუკიდებლად იყრის ამის შესახებ ეკონომიკის მეცნიერებათა დოქტორის, თბილისის სასწავლო უნივერსიტეტის რექტორის, სოლომონ პავლიაშვილის „ფეისბუქის“ ოფიციალურ გვერდზე გამოქვეყნებულ განცხადებაშია ნათქვამი, სადაც, ასევე, აღნიშნულია, რომ პავლიაშვილმა ეს გადაწყვეტილება ადგლობრივი მოსახლეობის დაჟინებული თხოვნის შემდეგ მიიღო.
„ჯი-ეიჩ-ენ“-მა, მცდელობის მიუხედავად, სოლომონ პავლიაშვილთან დაკავშირება ვერ მოახერხა.
შესაბამისად, უცნობია, თუ რატომ არ წარადგინა ის „ქართულმა ოცნებამ“ საგარეჯოს საარჩევნო ოლქში მაჟორიტარობის კანდიდატად, რაზეც კულუარებში კარგა ხანს ლაპარაკობდნენ.
არაოფიციალური ინფორმაციით, პავლიაშვილის კანდიდატურა, პრემიერ კვირიკაშვილის მხარდაჭერის მიუხედავად, პოლიტსაბჭოზე ეკა ბესელიამ და გედევან ფოფხაძემ დაბლოკეს, რომლებიც მხარს სხვა პიროვნებას უჭერდნენ, თუმცა საბოლოოდ, არც მათი წინადადება იქნა გათვალისწინებული.
ცნობისთვის: სოლომონ პავლიაშვილი 1999 წლის მოწვევის პარლამენტში საგარეჯოს მაჟორიტარი უკვე იყო. შემდეგ კი, ქონების მართვის მინისტრი გახდა და სწორედ მისი ინიციატივით გაუქმდა ეს უწყება.
