გერმანია ანკარასთან მოლაპარაკებების აღდგენას გეგმავს. ამ გადაწყვეტილების შესახებ ქვეყნის საგარეო საქმეთა მინისტრმა, ფრანკ-ვალტერ შტაინმაიერმა განაცხადა.
„ჩვენი მთავარი საზრუნავია, ამ რთულ ვითარებაში თურქეთთან ურთიერთობა მოვაგვაროთ და მოვიფიქროთ გზები, რითიც თურქეთში დაკავებულებს შეგვიძლია დავეხმაროთ“, - აღნიშნა შტაინმაიერმა.
ამასთან, შტაინმაიერის თქმით, სიკვდილით დასჯის აღდგენა, რასაც თურქეთის ხელისუფლება გეგმავს, ევროკავშირის ღირებულებებთან სრულიად შეუსაბამო იქნება.
თურქეთის ურთიერთობა ევროკავშირთან და განსაკუთრებით ავსტრიასთან მას შემდეგ დაიძაბა, რაც თურქეთის საგარეო საქმეთა მინისტრმა მევლუთ ჩავუშოღლუმ ვენას რადიკალური რასიზმის დედაქალაქი უწოდა. ეს მას შემდეგ მოხდა, რაც ავსტრიის კანცლერმა ქრისტიან კერნმა თურქეთის ევროკავშირში გაწევრიანების შესახებ მოლაპარაკებების შეწყვეტაზე რეკომენდაცია გასცა.
„ავსტრიის კანცლერი ჯერ საკუთარ ქვეყანას დააკვირდეს კარგად, სადაც ერთერთი ტენდენცია ადამიანის უფლებების მტრობაა, რასიზმი კი ერთერთი ღირებულება. ვენა რადიკალური რასიზმის დედაქალაქია“, - განაცხადა ჩავუშოღლუმ.
თურქეთის თავდაცვის მინისტრის განცხადებით კი, არმიის მასობრივი რესტრუქტურიზაცია პუტჩის განმეორების ყოველგვარი შესაძლებლობის აღკვეთას ისახავს მიზნად. ფიკრი იშიკის განმარტებით, ყოველგვარი ქმედება ნატო-ს სტანდარტებთან იქნება შესაბამისობაში.
ერდოღანმა ნატო-ს რიგით მეორე უმსხვილესი არმიიდან 3000 სამხედრო გაათავისუფლა, მათგან 40% გენერალია.
ამან კითხვები გააჩინა თურქეთის თავდაცვისუნარიანობასთან დაკავშირებით, განსაკუთრებით, ქვეყნის მეზობლად არსებული ვითარების გამო.
თურქეთის მთავრობის მიერ პუტჩის ორგანიზებაში ბრალდებული ფეთჰულა გიულენის აშშ-დან ექსტრადირებაზე კი ჯერ საუბარი არ არის.
სტამბოლის სასამართლომ ფეთჰულა გიულენის დაკავების ორდერი გასცა იმ ბრალდებით, რომ ის სავარაუდოდ გადატრიალების მცდელობის სათავეში იდგა და კონკრეტულ მითითებებს აძლევდა სამხედროებს. 75 წლის თურქი სასულიერო პირი ბრალდებას უარყოფს და მის მიმართ მიღებულ გადაწყვეტილებას არ აღიარებს.
