რუსეთის ფედერალური სამსახურის ე. წ. სამხრეთ ოსეთის სასაზღვრო სამმართველოს უფროსი ალექსანდრე მურზინი აცხადებს, რომ "საქართველოსა და სამხრეთ ოსეთს შორის არსებული სახელმწიფო საზღვრის გადაკვეთა საზღვრის გადაკვეთის ადგილებში (პერევი და მოსაბრუნი) გეგმიურად ხორციელდება".
"დღეისათვის საზღვრის გადაკვეთის ოფიციალური პუნქტები არ არსებობს. მოქმედებს საზღვრის გადაკვეთის ადგილები, სადაც გადაკვეთის დროებითი წესრიგი მოქმედებს. ასეთი ადგილები არის მოსაბრუნში _ სადაც საზღვრის გადაკვეთა ყველაზე მასობრივად მიმდინარეობს. და პერევი. დღე-ღამეში საზღვარს კვეთს 700-მდე ადამიანი ორივე მხრიდან", _ განაცხადა მურზინმა დღეს ცხინვალში მოწყობილ პრესკონფერენციაზე.
მისი თქმით, ამჟამად მიდის მუშაობა იმაზე, რომ ე. წ. სახელმწიფო საზღვრის გადაკვეთის რეჟიმი მოწესრიგდეს.
"აუცილებელია უფრო მკაფიოდ იქნეს განსაზღვრული ის კატეგორია და ის ტვირთები, რომლებიც საზღვრის გადაკვეთას შეძლებენ. ასევე უნდა განისაზღვროს ის კატეგორიები, რომელთა მიხედვითაც შესაძლებელი იქნება საზღვრის გადალახვა", _ განაცხადა მურზინმა და დასძინა, რომ ჯერჯერობით ადრეა იმაზე ლაპარაკი, რომ "საქართველოსა და სამხრეთ ოსეთს შორის საზღვარზე ახალი დამატებითი გამშვები პუნქტები გაიხსნას".
