,,გაივლის წლები და ეს კონკრეტული ბრიფინგი შევა КГБ-ს წარმატებულ ღონისძიებათა სიაში“ , - ამის შესახებ თავდაცვის ყოფილი მინისტრის ბაჩო ახალაიას სახელით გავრცელებულ განცხადებაშია ნათქვამი. ასე აფასებს საქართველოს მთავარ პროკუტატურაში გამართულ ბრიფინგს ბაჩო ახალაია, სადაც ცნობილი გახდა, რომ პროკურატურამ დავით ახალაია, გიორგი კალანდაძე, მეგის ქარდავა და რომან შამათავა პასუხისგებაში მისცა.
,,გამოვაცალოთ პროკურატურის დღევანდელ განცხადებას ყველაფერი, რაც მათი ბოროტი კითხვის მხატვრულ ჟანრს ახასიათებს. ცოტა ყურადღებით დავაკვირდეთ სხვა გარემოებებს - საქმეს, რომელიც ეხება თითქოს არშემდგარი ტერაქტის გამო ჩადენილ დანაშაულს.
მიუხედავად იმისა, რომ ეს კამპანიური ხასიათის თითქოს სისხლისსამართლებრივი დევნა, სინამდვილეში ფაქტი, უფრო მძიმე და დამაზიანებელია, ვიდრე ერთი შეხედვით შეიძლება ჩანდეს - არც მარტო ვინმესთვის რამე დანაშაულის დაბრალებაა და თუ გნებავთ არც რამე დანაშაულის გამოვლენა.
მე კი დანამდვილებით გეტყვით, რომ საქმე გვაქვს ქართული სპეცსამსახურების მთლიანად რუსეთისთვის გადაბარებასთან სრული მონაცემების ბაზებით, როგორც ჩანს, მათ შორის ყველა იმ ადამიანის გამოვლენასთან, რომლებიც ქართულ სპეცსამსახურებთან თანამშრომლობდნენ.
ამიტომაც დასკვნა საკმაოდ მძიმეა, რუსული სპეცსამსახურების ხელში როგორც ჩანს აღმოჩნდა ყველაფერი, რაც საქართველოს უსაფრთხოებისთვის ფარული გზებით კეთდებოდა წლების განმავლობაში. შესაბამისად ზუსტად შეიძლება ითქვას, რომ პროკურატურა თავისი ვიწრო ინტერესიდან გამომდინარე (მაგალითად გიგი კალანდაძის, რომელიც დღესაც რუსების წინააღმდეგ იბრძვის უკრაინაში, რომა შამათავას, რომლის საქმეშიც მთავარი მტკიცებულება ბაღაფშის პრესკონფერენცია იყო, ზურაბ შამათავას, ალექსანდრე გორგაძის, დათა ახალაიას ხელოვნური დევნა) არც კი იცის სინამდვილეში რას აკეთებს. ისინი უბრალოდ ბრმა შემსრულებლები არიან რუსული სპეცსამსახურების. რეალობა ისაა, რომ ასეთი დანაშაული არ მომხდარა და დასახელებულ ადამიანებს არაფერი აკავშირებთ წარდგენილ ბრალთან.
უფრო ცხადი რომ იყოს მარტივად გეტყვით, მე საქართველოში ვიმყოფები და წესით პროკურატურას ჩემგან უნდა მიეღო ჩვენება, უნდა დაინტერესებულიყო ხომ არ მიმდინარეობდა რამე სრულიად ლეგიტიმური ფარული საქმიანობა რუსული სპეცსამსახურების წინააღმდეგ, ხომ არ შეგვქმნია პრობლემა ჩვენი აგენტურის უსაფრთხოების გამო, ხომ არ დაგვჭირვებია რაიმე სახის ღონისძიებების გატარება, რომ კონკრეტული ადამიანის სიცოცხლე გადაგვერჩინა და შეგვენარჩუნებინა მისი შემდგომი პროდუქტიულობა.
მაგრამ ეს კითხვები შეიძლება გაჩენოდა ქართულ სამართალდამცავ ორგანოებს, რომლებიც როგორც ჩანს არ არსებობენ და მათ მაგივრად რუსული სპეცსამსახურები ცალ კარში თამაშობენ.
გაივლის წლები და ეს კონკრეტული ბრიფინგი შევა КГБ-ს წარმატებულ ღონისძიებათა სიაში, მაშინ ყველასთვის ყველფერი სრულიად ცხადი იქნება, შერცხვებათ მარტო მათ ვინც ბრმად აკეთებდა ასეთ საქმეებს და მერე ბრიყვულად იმეორებდა ამ სისულელეებს”, - ნათქვამია განცხადებაში.
