ფრაქცია „რესპუბლიკელების“ თავმჯდომარის, დავით ბერძენიშვილის განცხადებით, ღამით მიღებული გადაწყვეტილებები ძალიან ცუდ ასოციაციას იწვევს.
როგორც ჟურნალისტებს ბერძენიშვილმა განუცხადა, სამართლებრივ სივრცეში ყოფნა-არყოფნის საკითხი მას შემდეგ დადგა, რაც საკონსტიტუციო სასამართლომ გადაწყვეტილებები ნაჩქარევად მიიღო.
„ის, რომ საკონსტიტუციო სასამართლო იქცევა როგორც ხელისუფლების სხვა შტოების ფუნქციების მიმტაცებელი და სააკაშვილის ხელისუფლების ნარჩენი, ეს რესპუბლიკელებისთვის არგუმენტი არ არის, რომ ურთმელიძის სახით ჩვენი ხელისუფლება წარმოჩნდეს როგორც ფორმით და შინაარსით ასეთ ხელისუფლებად. „რესპუბლიკური პარტია“ ამ პროცესებს კატეგორიულად ემიჯნება. ღამით მიღებული გადაწყვეტილებები ძალიან ცუდ ასოციაციას იწვევს“, - აცხადებს ბერძენიშვილი.
მისივე თქმით, როგორც კანონმდებელი საკონსტიტუციო სასამართლოსა და უზენაესს სასამართლოს მოუწოდებს, რომ საკითხის პოლიტიზირებაში არ ჩაერთონ.
„ეს უნდა იყოს სამართლის საკითხები და არ უნდა იყოს ყოფილ და დღევანდელ ხელისუფლებებს შორის ინსტრუმენტად გადანაწილების საკითხები. ამიტომ კატეგორიულად იმის მოლოდინში ვარ, რომ პროცესები ნორმალურ მდგომარეობაში დაბრუნდება. მივმართავ როგორც საკონსტიტუციო სასამართლოს, ასევე უზენაესს სასამართლოს. ძალიან სახიფათო ხასიათს იღებს ეს პროცესები. საქართველოში ხელისუფლების ალტერნატიული ძალის ჩამოყალიბების საკითხი დღეს არ დგას. ხელისუფლების რეიტინგი არ არის ისეთი რაც 2012-ში იყო, მაგრამ მისი რეიტინგი გაცილებით მეტია, ვიდრე ნებისმიერი სხვა პოლიტიკური პარტიის. შესაბამისად, დღეს ხელისუფლებას ასეთი ურთმელიძისეული დათვური სამსახური არ სჭირდება. ამიტომ როგორც ჩანს, ურთმელიძე, რომელიც თავის დროზე გვარამიამ დანიშნა, გვარამიას კონტროლის ქვეშ იყო და ახლა ცდილობს, დღევანდელი უფროსობის კონტროლის ქვეშ იყოს. კონტროლირებადი მოსამართლეებია არ გვჭირდება - არც საკონსტიტუციო სასამართლოში, რომელიც ძველი ხელისუფლების კონტროლის ქვეშაა და არც უზენაესს სასამართლოსი", - დასძენს ბერძენიშვილი.
