საქართველოს პრემიერ-მინისტრი ირაკლი ღარიბაშვილი უახლოეს წუთებში დარიალის ხეობაში ჩავა.
როგორც ცნობილია, დარიალის ხეობაში 10 დღის წინ სტიქიის დროს დაზიანებული ინფრასტრუქტურის სრული რეაბილიტაცია მოხდა და დღეს გზის გახსნა იგეგმებოდა.
სამწუხაროდ, დღეს გამთენიისას კვლავ ამუშავდა სასიგნალო სისტემა, რის შემდეგაც განხორციელდა ხალხის ევაკუაცია. მოხდა მცირე ჩამოშლები და თერგის ადიდებამ კვლავ დააზიანა გარკვეული მონაკვეთები. დარიალის ხეობაში უკვე მობილიზებულია ტექნიკა, რომლის საშუალებითაც ტერიტორიაზე გზის გაწმენდა დაწყებულია და ინტენსიურად მიმდინარეობს.
შედარებით რთული ვითარება იყო სასაზღვრო-გამშვები პუნქტის ჩრდილოეთით, ე.წ. ნეიტრალურ ზონაში, სადაც ადიდებულია მდინარე და გზის მონაკვეთზე გადმოვიდა ქვა-ღორღი. ადგილზე მიმდინარეობს გაწმენდითი სამუშაოები, რათა დროულიად მოხდეს თერგის კალაპოტში დაბრუნება.
ირაკლი ღარიბაშვილი დარიალში უახლოეს წუთებში ჩავა და ინფორმაციას არსებული ვითარების შესახებ ადგილზე მიიღებს.
შეგახსენებთ, 10 დღის წინ დარიალის ხეობაში მეწყერი ჩამოწოლისას პრემიერ-მინისტრის დავალებით, შეიქმნა საგანგებო შტაბი. ადგილზე მობილიზებულია ტექნიკა და მიმდინარეობს გაწმენდითი სამუშაოები.
