სასწრაფო სამედიცინო მომსახურების ცენტრს სასწრაფო დახმარების 13 ახალი მანქანა შეემატება, - ამის შესახებ თბილისის მერმა, დავით ნარმანიამ დღეს 112-ის სათაო ოფისში სტუმრობისას განაცხადა. თბილისის მერი 112-ის მუშაობის სპეციფიკას ადგილზე გაეცნო და დეპარტამენტის დირექტორთან, გიორგი ბიჭაშვითან ერთად კოორდინაციის საკითხები განიხილა.
შეხვედრაზე ასევე, გამოძახების ერთიანი სტანდარტის დანერგვაზე, ზუსტი პრიორიტეტების განსაზღვრული პროგრამის დანერგვასა და რადიოკომუნიკაციის სისტემის განახლებაზე ისაუბრეს. დღეისათვის დედაქალაქს დღე-ღამის განმავლობაში სასრაფო დახმარების 80 ეკიპაჟი ემსახურება, ხოლო დამატებით რეზერვში სასწრაფო დახმარების 16 მანქანაა. 13 ახალი მანქანა კი, სასწრაფო სამედიცინო მომსახურების ცენტრს ტენდერის დასრულების შემდეგ შეემატება.
შეხვედრაზე მხარეებმა საგზაო ქსელის გამტარუნარიანობის გაზრდაზე, უსაფრთხოების გაუმჯობესებასა და გამონაბოლქვით გამოწვეულ ეკოლოგიურ პრობლემებზეც ისაუბრეს. როგორც დავით ნარმანიამ განაცხადა, მერია აპირებს, ჩაატაროს კველვა, რომლის საფუძველზეც დადგინდება სატრანსპორტო ნაკადების ზუსტი რაოდენობა და ამის შემდეგ მოხდება საზოგადოებრივი ტრანსპორტის სწორი გადანაწილება.