არასამთავრობო ორგანიზაცია „ადამიანი კანონი თავისუფლება"-ს თავმჯდომარემ გიორგი ჭულუხაძემ და ორგანიზაციის აღმასრულებელმა დირექტორმა ნიკოლოზ მაღალდაძემ სახელმწიფო რწმუნებულთან-გუბერნატორთან ლანჩხუთის, ოზურგეთისა და ჩოხატაურის მუნიციპალიტეტებში, გიორგი ჩხაიძესთან შეხვედრა გამართეს.
შეხვედრაზე განხილულ იქნა, როგორც რეგიონში არსებული პრობლემატური საკითხები და მათი მოგვარების გზები, ასევე სამომავლოდ გუბერნიაში განსახორციელებელი პროექტები. გუბერნატორის განცხადებით, გურია წარმოადგენს რეგიონს, სადაც ამ დროისთვისაც კი არ არის გაზიფიცირებული ლანჩხუთისა და ჩოხატაურის რაიონები, მოუწესრიგებელია წყლისა და კომუნიკაციის საკითხები. როგორც გუბერნატორმა აღნიშნა, ეტაპობრივად დაიწყო ამ საკითხების მოგვარება და 2016 წლის ბოლოსთვის მოსახლეობის 80% იქნება გაზიფიცირებული, ასევე გაიმართება წყლისა და კანალიზაციის კომუნიკაციები.
საუბარი შეეხო სტიქით დაზარალებულებსაც. გუბერნატორმა განაცხადა, რომ ამ დროისთვის რეგიონს 450 სტიქიით დაზარალებული ოჯახი ყავს, რომელთა საკითხი სრულად არის გადაწყვეტილი და მათ შესაბამისი კომპენსაცია ურიგდებათ.
გუბერნატორის თქმით, გუბერნიაში ერთ-ერთ უდიდეს პრობლემას დასაქმების საკითხი წარმოადგენს. მისი თქმით, სამწუხაროა ის ფაქტი, რომ სოციალური პროექტი, რომელიც სოციალურად დაუცველთათვის დახმარების გაწევას ითვალისწინებს, გარკვეულწილად ხელს უშლის მათ დასაქმებას იმ თვალსაზრისით, რომ აღნიშნული დახმარების არდაკარგვის მიზნით ისინი, თუნდაც მცირე ანაზღაურებიან პოზიციაზე დასაქმებას, ერიდებიან.
გუბერნატორი წლევანდელი ტურისტული ნაკადით კმაყოფილებას გამოთქვამს და აცხადებს, რომ იმისთვის, რომ ტურიზმით ადგილობრივ ბიუჯეტში დამატებით შევიდეს თანხები, სახელმწიფო ბიუჯეტიდან გამოყოფილია 50 მილიონი, რომელიც ზღვისპირა ზოლის გაზიფიცირების, წყლისა და საკანალიზაციო სისტემის მოწესრიგების საკითხებს მოხმარდება, რაც მეტ კომფორტს შეუქმნის დამსვენებლებს და გაზრდის ტურისტის რაოდენობას. პროექტის დასრულება 2017 წლამდე იგეგმება.
საუბარი ციტრუსის მოსავლიანობისა და მისი რეალიზაციის საკითხსაც შეეხო, რაც ადგილობრივი მოსახლეობისთვის ძირითად შემოსავლის წყაროს წარმოადგენს. გუბერნატორს მიაჩნია, რომ როგორც გასულ წელს ასევე მიმდინარე წელსაც ციტრუსის მოსავლის დიდი ნაწილი ექსპორტზე გავა რუსეთში. აქვე, გიორგი ჩხაიძემ აღნიშნა, რომ გლეხების ხელშეწყობის მიზნით სოფლის მეურნეობის სამინისტროსთან ერთობლივად ხორციელდება პროექტი რომელიც ნიადაგ-შემსწავლელი ლაბორატორიის, ნერგების გამომყვანი და სანერგე მეურნეობის მშენებლობას ითვალისწინებს. ასევე იგეგმება ინვიტრო ლაბორატორიის შეძენაც.
ორგანიზაციის წარმომადგენლები თანამშრომლებზე გაცემული პრემიების საკითხითაც დაინტერესდნენ. გუბერნატორმა ცალსახად განაცხადა, რომ მისი ხელმღვანელობის პერიოდში, პრემია მხოლოდ ერთხელ, ივნისის თვეში გაიცა და ისიც არა ყველა თანამშრომელზე, არამედ სამაშველო სამსახურის წარმომადგენლებზე, რომელთაც დაუზოგავად იშრომეს სტიქიის დროს და ადმინისტრაციის რამოდენიმე თანამშრომელზე, რომლებიც კოორდინაციას უწევდნენ აღნიშნულ საკითხს.
გუბერნიაში გატარდა საკადრო ცვლილებები, მოხდა ლუსტრაცია იმ გარემოებიდან გამომდინარე, რომ ადმინისტრაციაში მუშაობდნენ როგორც პოლიტიკური ნიშნით დანიშნული, ასევე კვალიფიციური ადამიანები. კონკურსისა და ატესტაციის მეშვეობით ყველას მიეცა საკუთარი შესაძლებლობების წარმოჩენის საშუალება.
რეგიონის გუბერნატორი და ორგანიზაციის წარმომადგენლები ურთიერთთანამშრომლობის ფორმატით მუშაობაზე შეთანხმდნენ. არასამთავრობო ორგანიზაცია „ადამიანი კანონი თავისუფლება" გურიის გუბერნიაში, ახალგაზდების სამოქალაქო ინტერესის და აქტიობის ასამაღლებლად, ახალგაზრდული პროექტის განხორციელებას შეეცდება.