იაკუტიელმა შამანმა ალექსანდრ გაბიშევმა რუსეთის წინააღმდეგ საჩივარი ადამიანის უფლებათა ევროპულ სასამართლოში შეიტანა. იუწყება რუსული მედია, ერთ-ერთ არასამთავრობო ორგანიზაციაზე დაყრდნობით.
საჩივარი ეხება გაბიშევისა და მისი ორი თანმხლები პირის უფლებების უხეშ დარღვევას, როდესაც ისინი რუსმა სამართალდამცავებმა მოსკოვისკენ მიმავალ გზაზე დააკავეს.
შამანმა ალექსანდ გაბიშევმა, კრემლიდან პუტინის განსადევნად, იაკუტიიდან მოსკოვისკენ მსვლელობა გასული წლის მარტში დაიწყო. წინასწარი გათვლებით, 8000-კილომეტრიანი გზის გავლას დაახლოებით ორი წელი დასჭირდებოდა.
3000 კილომეტრის გავლის შემდეგ, გასული წლის სექტემბერში შამანი ბურიატიის გზატკეცილზე დააკავეს.
რუსეთში მის წინააღმდეგ სისხლის სამართლის საქმეც აღიძრა "ექსტრემისტული საქმიანობის" ბრალდებით. მოგვიანებით, სამედიცინო შემოწმებამ გაბიშევი ფსიქიკური დარღვევების მქონე ადამიანად გამოაცხადა.
გასული წლის დეკემბერში, შამანმა განაახლა თავისი ისტორიული მსვლელობა, რა დროსაც ის და მისი ორი მხარდამჭერი კვლავ დააკავეს.
გაბიშევის მტკიცებით, ვლადიმერ პუტინს "ბნელი ძალები მართავენ" და მხოლოდ შამანს ძალუძს მისი განდევნა.