იაპონიის ქალაქ ოსაკაში, დიდი ოცეულის, G20, სამიტის ფარგლებში დიდი ბრიტანეთის პრემიერ-მინისტრის, ტერეზა მეისა და რუსეთის პრეზიდენტის, ვლადიმერ პუტინის პირისპირ შეხვედრა გაიმართა.
ბრიტანული მედიის ინფორმაციით, პირისპირ შეხვედრისას, ტერეზა მეიმ კიდევ ერთხელ შეახსენა პუტინს რუსეთის სპეცსამსახურის ყოფილი თანამშრომლის სერგეი სკრიპალისა და მისი ქალიშვილის იულია სკრიპალის მოწამვლის საკითხი და უთხრა, რომ დაუშვებელია მსგავსი თავდასხმის განმეორება.
„სასიკვდილო მომწამვლელი ნივთიერების „ნოვიჩოკის“ გამოყენება მიუღებელი ქცევა და საშინელი ქმედება იყო, რომელსაც შეეწირა ბრიტანეთის ერთი მოქალაქის სიცოცხლე“, - უთხრა მეიმ პუტინს.
ტერეზა მეიმ ასევე ხაზი გაუსვა იმას, რომ ბრიტანეთი მიესალმება ურთიერთობებს ორ ქვეყენას შორის, თუმაც ამისთვის რუსეთის ხელისუფლებამ სხვა გზა უნდა აირჩიოს.
„დიდი ბრიტანეთი გააგრძელებს ლიბერალური დემოკრატიის გაძლიერებისთვის ზრუნვას და ადამიანის უფლებების, თანასწორობის, მათ შორის ლგბტ ადამიანების, დაცვას“, - დასძინა ტერეზა მეიმ.
შეგახსენებთ, იაპონიაში, კერძოდ კი ქალაქი ოსაკაში "დიდი ოცეულის" სამიტი მიმდინარეობს.
მოკლედ სკრიპალების მოწამვლის საქმეზე
რუსეთის სამხედრო დაზვერვის ყოფილი ოფიცრის სერგეი სკრიპალის მკვლელობის მცდელობა დიდ ბრიტანეთში, რომელსაც ადგილი ჰქონდა 2018 წლის 4 მარტს ინგლისის ქალაქ სოლსბერიში. თავდასხმის შედეგად ასევე მოიწამლა მოსკოვიდან მამასთან სტუმრად ჩასული იულია სკრიპალი და დაზიანება მიიღო სულ მცირე 21-მა ადამიანმა.
ბრიტანელი სამართალდამცავების მიერ გამოძიება მკვლელობის მიზნით თავდასხმის კვალიფიკაციით მიმდინარეობს.
14 მარტს გაერთიანებული სამეფოს მთავრობამ მომხდარში ოფიციალურად ბრალი დასდო რუსეთის სახელმწიფოს და რუსეთის 23 დიპლომატი ქვეყნიდან გააძევა.
წინასწარი ინფორმაციით თავდასხმა განხორციელდა რუსეთის სპეცსამსახურების მიერ საიდუმლო ზემძლავრი ნერვული აგენტის "ნოვიჩოკის"გამოყენებით.