ჩრდილოატლანტიკური ალიანსის გადაწყვეტილებით, ერაყში სამხედრო სწავლება დროებით შეჩერდა. იტყობინება Politico ნატოს პრესსპიკერის დილან უაიტის განცხადებაზე დაყრდნობით.
"ერაყში ჩვენი პერსონალის უსაფრთხოება უაღრესად მნიშვნელოვანია. ვაგრძელებთ უსაფრთხოებისთვის საჭირო ყველა ზომის მიღებას", - თქვა პრესსპიკერმა მას შედეგ, რაც გავრცელდა ცნობა ირანელი გენერლის ყასიმ სულეიმანის მკვლელობის შესახებ.
დილან უაიტის თქმით, ნატოს გენერალური მდივანი იენს სტოლტენბერგი, ბოლო დროინდელი მოვლენების გათვალისწინებით, ტელეფონით ესაუბრა აშშ-ის თავდაცვის მდივანს მარკ ესპერს.
გუშინ ცნობილი გახდა, რომ ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.
31 დეკემბერს ბაღდადში საპროტესტო აქციის მონაწილეები თავს დაესხნენ ერაყში შეერთებული შტატების საელჩოს და მის ტერიტორიაზე შეჭრას შეეცადნენ. თუმცა მათი მოგერიება მოახერხეს ამერიკელმა სამხედროებმა.
საპროტესტო აქციის მონაწილეები გმობენ აშშ-ის მიერ ერაყში განთავსებულ "ჰეზბოლას" ობიექტებზე განხორციელებულ ავიაიერიშს, რომელსაც 25 ადამიანი ემსხვერპლა.
აშშ-ის საელჩომ ბაღდადში, საპროტესტო აქციების გამო, მუშაობა შეწყვიტა.