ეუთო-ს საპარლამენტო ასამბლეის ძირითადი კომიტეტების გაერთიანებულ სხდომაზე, სოფიო ქაცარავამ, დელეგატებს, პოლიტიკურ საქმეთა და უსაფრთხოების კომიტეტის თავმჯდომარის, ფილიპო ლომბარდის მიერ მიგრაციის საკითხებზე წარდგენილი ანგარიშის საპასუხოდ მიმართა.
საგარეო ურთიერთობათა კომიტეტის თავმჯდომარემ, მიგრაციის გამოწვევებზე ისაუბრა, რაც ეუთო-ს თავმჯდომარე ქვეყნის - იტალიის პრიორიტეტიცაა. სოფიო ქაცარავამ განსაკუთრებული ყურადღება გაამახვილა იძულებით გადაადგილებულ პირთა საკითხზე, რაც ბოლო 20 წლის მანძილზე, საქართველოს უდიდეს პრობლემად რჩება. ქართველმა დელეგატმა ხაზი გაუსვა ამ გამოწვევის ეუთო-ს სივრცეში არსებობას.
„წევრი ქვეყნების ყურადღება უნდა მიიმართოს იძულებით გადაადგილებულ პირთა სტატუსის გამომწვევ მიზეზებსა და მათ მოგვარებაზე, რაც აქტიურად უნდა დადგეს ეუთო-ს საპარლამენტო ასამბლეის დღის წესრიგში", - განაცხადა სოფიო ქაცარავამ.