თბილისში, გაბრიელ სალოსის გამზირზე სპეცრაზმმა, სავარაუდოდ, შტურმი დაიწყო. სროლა რამდენიმე წუთის წინ დაიწყო. დაახლოებით ერთი საათის წინ კი, ადგილზე სპეცდანიშნულების რაზმის მობილიზება მოხდა.
არსებული ინფორმაციით, შენობიდან, სადაც სავარაუდოდ დანაშაულებრივი ჯგუფის წევრები იმყოფებიან, გამოდის კვამლი, ჩამსხვრეულია შუშები.
ადგილზე შსს-ს სხვადასხვა დეპარტამენტის წარმომადგენლები მიიყვანეს. ადგილზე შეყვანილია სპეციალური ჯავშანმანქანები - ე.წ. "კობრა". სამართალდამცველები მოქალაქეებს ტერიტორიის დატოვებისკენ მოუწოდებენ.
გაბრიელ სალოსის გამზირზე მძიმე ტექნიკის მობილიზებაც ხდება. ტექნიკა იმ სადარბაზოსთან განთავსდა, სადაც სპეცოპერაცია 18 საათზე მეტია მიმდინარეობს.
ცნობისთვის, ადგილზე სროლის ხმა ისმის. ტერიტორიაზე რამდენიმე წუთის წინ სახანძრო მანქანა შევიდა. ადგილიდან დაჭრილი სპეცრაზმელი გაიყვანეს.
შეგახსენებთ, ბერი გაბრიელ სალოსის ქუჩაზე გვიან ღამიდან მოყოლებული, სპეცოპერაცია მიმდინარეობს.
ადგილზე რჩება საპატრულო პოლიციის რამდენიმე ეკიპაჟი. სამართალდამცავების ნაწილი იმ კორპუსის მეორე სართულზე იმყოფება, სადაც სპეცოპერაცია მიმდინარეობს.
არსებული ინფორმაციით, 46 კორპუსის მე-3 სართულზე შეიარაღებული პირები იმყოფებიან, სადაც მათი აყვანის ოპერაცია მიმდინარეობს.