ილიას სახელმწიფო უნივერსიტეტის სტუდენტები უნივერსიტეტიდან 25-მდე ლექტორის გათავისუფლებას აპროტესტებენ და დეკანის გადადგომას ითხოვენ.
„ძალა სტუდენტებშია“ - ამ სლოგანით ისინი უნივერსიტეტის წინ აქციას მართავენ და აცხადებენ, რომ ლექტორების გათავისუფლება სრულიად უსაფუძვლო და არასამართლიანი პროცესია.
უნივერსიტეტის შენობის წინ შეკრებილების თქმით, არგუმენტი, რომელითაც ილიას სახელმწიფო უნივერსიტეტის ბიზნესის სკოლის დეკანმა, ნინო პატარაიამ, ლექტორების გაშვების მიზეზად დაასახელა, არის უსაფუძვლო და საღ აზრს მოკლებული, ამიტომაც, მათი განცხადებით, გათავისუფლებული ლექტორები სამსახურში უნდა აღადგინონ.
ცნობისთვის, დეკანის განცხადებით, ლექტორები 5 სექტემბერს ამოქმედებული უმაღლესი საგანმანათლებლო დაწესებულების ავტორიზაციის სტანდარტების საფუძველზე გაათავისუფლა.