საპარლამენტო უმრავლესობის წევრის, ლევან კობერიძის განცხადებით, წინა ხელისუფლების დროს „სითი პარკთან“ გაფორმებული კონტრაქტი ახლაც თავსატეხია.
„„სითი პარკთან“ გაფორმებული კონტრაქტი რეალურად, ახლაც თავსატეხია, არა მარტო ჩვენთვის, არამედ უპირველესად, მოსახლეობისათვის. ამ საკითხის გადაწყვეტის გზა ჩემთვის „სითი პარკის“ გაუქმებით და ქვეყნიდან მისი გაშვებით იწყება. ძალიან დიდი იმედი მაქვს, რომ ჩვენ მოვახერხებთ ამ საკითხის დაყენებას და განხილვას, ისევე, როგორც ის ხელისუფლება გავისტუმრეთ ჩვენ შესაბამის ადგილას.
„სითი პარკის“ და მისი მსგავსი კონტრაქტები დღემდე რჩება მოსახლეობის თავის ტკივილად და ეს საკითხი რაღაცნაირად უნდა იყოს გადაწყვეტილი, რადგან ეს ჩვენი პასუხისმგებლობაა და არა ოპოზიციის, ისინი ამ თემაზე ძალიან ლაღად საუბრობენ“, - განაცხადა ლევან კობერიძემ პარლამენტის პლენარულ სხდომაზე, სადაც „ადმინისტრაციულ სამართალდარღვევათა კოდექსში“ შესატან ცვლილებებს განიხილავენ.
