მოძრაობა "სამართლიანი საქართველოსთვის" საარჩევნო მდივნის ვლადიმერ ბოჟაძის განცხადებით, სააკაშვილის ხელისუფლება 2010 წლის 30 მაისის ადგილობრივი თვითმმართველობის არჩვენების გაყალბებისთვის ემზადება და ამ გზით აპირებს ძალაუფლების შენარჩუნებას. 10 მარტს გამართულ პრესკონფერენციაზე ვლადიმერ ბოჟაძემ ილაპარაკა იმ ბერკეტებზე და მექანიზმებზე, რომელთა გამოყენებითაც, მისი აზრით, მმართველი გუნდი არჩევნების შედეგების ფალსიფიცირებას გეგმავს.
"პრეზიდენტმა სააკაშვილმა საარჩევნო კანონმდებლობა და ადმინისტრაციის შემადგენლობა საკუთარი პარტიის და მმართველი ელიტის ინტერესებს მოარგო. ამის ნათელი დადასტურებაა პროფესიული ნიშნით ცენტრალური საარჩევნო კომისიის სამი წევრის დანიშვნა და კომისიის თავმჯდომარის კანდიდატურის შეთანხმება მხოლოდ `ნაციონალურ მოძრაობასთან'', _ აცხადებს მოძრაობის საარჩევნო მდივანი.
მისი თქმით, არჩევნების გაყალბების მცდელობის დასტურია ისიც, რომ ცესკოს მიერ გამოქვეყნებული ამომრჩეველთა ერთიანი სიის ელექტრონული ვერსია (2010 წლის 1-ლი თებერვლის მდგომარეობით) უამრავ უზუსტობას შეიცავს. კერძოდ, თვალშისაცემია ამომრჩეველთა რაოდენობის მკვეთრი ზრდა.
2009 წლის 1-ლი აგვისტოს მდგომარეობით, ამომრჩეველთა რაოდენობა შეადგენდა 3,5 მილიონ კაცს, ხოლო 2010 წლის 1-ლი თებერვლის მდგომარეობით, უკვე ორასი ათასით მეტი _ 3,7 მილიონი ამომრჩეველია რეგისტრირებული. ამასთან, ამომრჩევლების მონაცემები არ არის დახარისხებული საარჩევნო უბნების მიხედვით, რაც, პრაქტიკულად, შეუძლებელს ხდის ამომრჩეველთა ზუსტი რაოდენობის დადგენას და წინა არჩევნების მონაცემებთან შედარებას~, _ აცხადებს ბოჟაძე.
მისი განცხადებით, ცესკოს მიერ შედგენილი საარჩევნო უბნების საზღვრებში არსებული მასობრივი უზუსტობების აღმოსაჩენად და დასაფიქსირებლად, მოძრაობამ ჯერ კიდევ 2009 წლის დეკემბრიდან დაიწყო პროგრამა "კარდაკარი~. მისი მიმდინარეობის პროცესში კარდაკარ გადამოწმდა ამომრჩეველთა ერთიანი სია.
"ნაპოვნია 300-მდე არარსებული კორპუსი. სიაში მრავლად გვხვდება ფიქტიური და ვირტუალური მისამართები, რომლებზედაც ათობით და ასობით ფიზიკურად არარსებული ამომრჩეველია მიწერილი. გვხვდება მთელი რიგი კორპუსების დუბლირება ორი ან მეტი საარჩევნო უბნის ფარგლებში. მშენებარე და დაუმთავრებელ კორპუსებში, სადაც ჯერ არავინ ცხოვრობს, ხელისუფლებამ უკვე მოასწრო მრავალი მოქალაქის რეგისტრაცია", _ აცხადებს მოძრაობის საარჩევნო მდივანი.
მისი თქმით, შემოწმების შედეგად გამოვლინდა ისეთი ერთ-, ორ- და სამოთახიანი საცხოვრებელი ბინები, სადაც 150 ამომრჩეველია რეგისტრირებული. ასევე, აღმოჩენილია უამრავი არასაცხოვრებელი დანიშნულების შენობა-ნაგებობა (კომერციული დანიშნულების ობიექტი), სადაც რეგისტრირებულია ათეულობით ამომრჩეველი.
"უკანასკნელ პერიოდში განსაკუთრებით გაზრდილია თბილისის ამომრჩეველთა რაოდენობა, რაც ადასტურებს ოპოზიციის მოსაზრებას, რომ ხელისუფლებამ რეგიონებიდან საკუთარი მხარდამჭერები დედაქალაქში მასობრივად გადმოწერა", _ აცხადებს ბოჟაძე.
მოძრაობის საარჩევნო მდივანი დარწმუნებულია, რომ ხელისუფლების მხრიდან არჩევნების გაყალბების პროცესი უკვე დაწყებულია. ამასთან, მოძრაობის საარჩევნო მდივანი საზოგადოებას ჰპირდება, რომ ზურაბ ნოღაიდელის გუნდი ყველაფერს გააკეთებს იმისათვის, რომ წინ აღუდგეს არჩევნების გაყალბების ხელისუფლებისეულ გეგმას.
