ქარელის მუნიციპალიტეტის გამგეობამ საახალწლოდ იძულებით ადგილნაცვალი პირები და სოციალურად დაუცველი ადამიანები დაასაჩუქრა. სასაჩუქრე პაკეტი, რომელშიც ხილი, ტკბილეული და სხვადასხვა პროდუქტი შედის დევნილთა 271-მა ოჯახმა მიიღო. გარდა ამისა, დასაჩუქრდა 92 სამამულო ომის ვეტერანი და 28 ოჯახი, რომელთა ოჯახის წევრიც აგვისტოს, სამაჩაბლოსა და აფხაზეთის ომში დაიღუპა. საახალწლო საჩუქარი მუნიციპალიტეტში მცხოვრებმა 10 -მა უხუცესმაც მიიღო.
მუნიციპალიტეტის ორგანიზებით 23 საათზე ქალაქის ცენტრში ღია ცის ქვეშ კონცერტია დაგეგმილი, რომელშიც ადგილობრიივ შემოქმედებითი ჯგუფები მიიღებენ.
ხვალ კი კულტურის სახლში ბავშვებისთვის საახალწლო ზეიმი გაიმართება, სადაც სხვა ბავშვებთან ერთად დევნილი ბავშვებიც არიან მიწვეული. ღონისძიებაზე მისული ყველა ბავშვი საჩუქარს მიიღებს.
