კოალიცია "ცვლილებბეისთვის" ერთ-ერთი ლიდერი ზურაბ ჯაფარიძე "ტვ პირველის" მიერ გავრცელებულ ანონსს ეხმიანება, სადაც ჩანს კადრები, რომლის თანახმად, პოლიციის განყოფილებებში პოლიციელები მოქალაქეებს სცემენ და სასტიკად ექცევიან.
"ეს ქობულეთში მოხდაო რამდენიმე წლის წინ, იმერეთიდან ჩასული სამი პოლიციელი სცემს დაკავებულებს, ერთეული შემთხვევააო
გორში რომ 10 მოზვერი სცემდა ერთ დაკავებულს, ერთეული შემთხვევააო
ძირს დაგდებულ ზვიად მაისაშვილს რომ სახეში ურტყეს წიხლები, ერთეული შემთხვევააო
როგავას რომ კინაღამ კისერი მოტეხა, ერთეული შემთხვევააო
ყველაფერი რაც კამერაზე ხვდება და ჟონავს, არის ერთეული შემთხვევები
ბევრი დაგროვდა უბრალოდ
თორემ ისე, არანაირი სისტემური ძალადობა
კამერებს მიღმა ანგელოზები მოძრაობენ ფორმებში
პოლიციელი გმირია",- წერს ჯაფარიძე.
შეგახსენებთ, "ტვ პირველის" მიერ გასაჯაროვებული კადრების შემდეგ, შსს-მ გაავრცელა განცხადება, რომელშიც აღნიშნავს:
"ერთ-ერთი ტელეკომპანიის მიერ გავრცელდა გადაცემის ანონსი, რომელიც ასახავს პოლიციელების მიერ ჩადენილ ძალადობის ფაქტს. საქმე ეხება 2022 წლის ზაფხულში, აჭარის რეგიონში, ქობულეთში, მივლინებით მყოფი, იმერეთის პოლიციის დეპარტამენტის სამ თანამშრომელს, რომლებმაც ჩაიდინეს კადრებში ასახული დანაშაული.
აღნიშნული დანაშაული გამოვლინდა მიმდინარე წლის თებერვლის თვეში საქართველოს შინაგან საქმეთა სამინისტროს გენერალური ინსპექციის მიერ, საიდანაც გადაგზავნილი მასალების საფუძველზე დაიწყო გამოძიება და 2026 წლის 23 თებერვალს საქართველოს პროკურატურის მიერ სამივე პოლიციელი დაკავებულ იქნა ბრალდებულის სახით".
