უახლოეს დღეებში, შესაძლოა, ლიბიაში ცეცხლი შეწყდეს. ეს სამშვიდობო გეგმის ერთ-ერთი უმთავრესი პირობაა, რომელიც დაპირისპირებულ მხარეებს აფრიკულმა კავშირმა შესთავაზა.
გეგმა ავიაიერიშების შეჩერებისაკენ მოუწოდებს ნატოსაც, რომლის ავიაციამაც მხოლოდ გუშინ ლიბიის სამთავრობო ძალების 25 ტანკი გაანადგურა. ამის შემდეგ ქალაქ აშდაბიაზე ლიბიის ოპოზიციამ კონტროლი აღადგინა.
მუამარ კადაფი ქვეყანაში შექმნილი კრიზისის მოსაგვარებლად აფრიკული კავშირის სამშვიდობო გეგმას დათანხმდა. განცხადება ამის შესახებ მუამარ კადაფთან მოლაპარაკების შემდეგ სამხრეთ აფრიკის პრეზიდენტმა გააკეთა.
სამშვიდობო გეგმის დეტალები უცნობია, თუმცა გავრცელებული ინფორმაციით, ის დაუყოვნებლივ ცეცხლის შეწყვიტას, უცხო ქვეყნის მოქალაქეების დაცვასა და ქვეყანაში ჰუმანიტარული დახმარების შეუფერხებლად შეტანას ითვალისწინებს.
შეხვედრაზე, რომელსაც ხუთი აფრიკული ქვეყნის წარმომადგენელი ესწრებოდა, მუამარ კადაფის გადადგომის საკითხიც განიხილეს.
აფრიკული კავშირის დელეგაცია დღეს ქალაქ ბენგაზიში ჩავა, სადაც ლიბიის ოპოზიციის შტაბია განთავსებული. მუამარ კადაფის შემდეგ ისინი ცეცხლის შეწყვეტის აუცილებლობის შესახებ ამბოხებულთა დარწმუნებას შეეცდებიან.
