აშშ-ის საერთაშორისო განვითარების სააგენტოს (USAID) ფედერალური და საზღვარგარეთის მისიების თანამშრომლები უჩივიან დონალდ ტრამპის ადმინისტრაციას, რათა აღკვეთონ სააგენტოს დაშლა და საგარეო დახმარების გაყინვა. იტყობინება გამოცემა NPR  და The New York Times-ი.

"[ტრამპის ადმინისტრაციის] ქმედებებმა შექმნა გლობალური ჰუმანიტარული კრიზისი, რაც გამოწვეულია USAID-ის თანამშრომლების, გრანტის მიმღებთა და კონტრაქტორთა კრიტიკულად მნიშვნელოვანი მუშაობის შეჩერებით.

შედეგად, ათასობით ამერიკელმა დაკარგა სამუშაო ადგილი და საფრთხე შეექმნა აშშ-ის ეროვნული უსაფრთხოების ინტერესებს", - ციტირებენ გამოცემები ვაშინგტონის ფედერალურ სასამართლოში შეტანილ სარჩელს.

დოკუმენტში ხაზგასმულია, რომ მხოლოდ კონგრესს შეუძლია USAID-ის დახურვა და ტრამპის ადმინისტრაციის ქმედებები არის "არაკონსტიტუციური და უკანონო".

6 თებერვალს გავრცელდა ცნობა, რომ ტრამპის ადმინისტრაცია აპირებს USAID-ის თანამშრომელთა რაოდენობის შემცირებას ამჟამინდელი 10000-დან 294 ადამიანამდე

შემცირება შეეხება, როგორც მუდმივ თანამშრომლებს, ასევე ათასობით კონტრაქტორს, რომელთაგან ბევრი უკვე შვებულებაში გაუშვეს ან გაათავისუფლეს სამსახურიდან.

ამჟამინდელი მდგომარეობით, მხოლოდ USAID-ში მთელი მსოფლიოს მასშტაბით, მხოლოდ 294 ძირითადი თანამშრომელი დარჩება. სისტემებზე წვდომა სხვა პერსონალისთვის, ელ.ფოსტის ჩათვლით, შეწყდება.

3 თებერვალს ცნობილი გახდა, რომ დაიხურა USAID-ის ვაშინგტონის სათაო ოფისი. იქ დასაქმებულ პერსონალს კი ელექტრონული ფოსტით აცნობეს, რომ მათი სამსახურში გამოცხადება აღარ იყო საჭირო.

იმავე დღეს გავრცელდა ინფორმაცია, რომ დონალდ ტრამპმა USAID-ის ადმინისტრატორის მოვალეობა სახელმწიფო მდივან მარკო რუბიოს დააკისრა.

რამდენიმე დღის წინ, ულტრამილიარდერმა ილონ მასკმა, რომელიც მთავრობის ეფექტურობის დეპარტამენტს უდგას სათავეში, კრიტიკის ქარ-ცეცხლი დაატეხა თავს USAID-ს და მას კრიმინალური ორგანიზაცია და "გველების ბუდე" უწოდა.

სააგენტოს კრიტიკაში მასკს მიემხრო პრეზიდენტი ტრამპი, რომლის თქმითაც USAID-ს "რადიკალი შეშლილები" მართავენ.

USAID-ი, რომლის წლიური ბიუჯეტი თითქმის 43 მილიარდი დოლარია, პასუხისმგებელია უცხოეთის ქვეყნებისთვის აშშ-ის დახმარების მართვასა და განვითარების სფეროში თანამშრომლობაზე.

2025 წლის იანვარში დონალდ ტრამპმა USAID-ის პროგრამები 90 დღით შეაჩერა აშშ-ის საგარეო პოლიტიკურ კურსთან მათი შესაბამისობის დადგენამდე.

USAID-ს 10 000 მეტი თანამშრომელი ჰყავს, რომლის ორი მესამედი საზღვარგარეთ 60-ზე მეტ ქვეყანაში და რეგიონულ მისიაში.