საერთაშორისო რესპუბლიკური ინსტიტუტის (IRI) კვლევის მიხედვით, კითხვაზე, უჭერთ თუ არა მხარს საქართველოს გაწევრიანებას ნატო-ში, გამოკითხულთა 78 პროცენტი მხარს უჭერს, ხოლო 15 პროცენტი არა. მათ შორის 59 პროცენტი სრულად უჭერს მხარს ნატო-ში გაწევრიანებას, ხოლო 19 მეტ-ნაკლებად.
ამასთან, კატეგორიულად ეწინააღმდეგება ნატო-ში გაწევრიანებას გამოკითხულთა 8 პროცენტი, ხოლო მეტ-ნაკლებად – 6 პროცენტი.
კითხვაზე პასუხი არ აქვს/არ იცის 8 პროცენტმა.
ამასთან, გამოკითხულთა 23 პროცენტი ნატო-ში გაწევრიანებისთვის ქვეყნის მთავარ სარგებლად უსაფრთხოებას ასახელებს, 20 პროცენტი თავდაცვას, 13 პროცენტი ეკონომიკის განმტკიცებას, 11 პროცენტი დაკარგული ტერიტორიების დაბრუნებას, 8 პროცენტი სტაბილურობას, 4 პროცენტი სამხედრო მხარდაჭერას, სამი პროცენტი უკეთეს მომავალს.
კითხვაზე, თქვენი აზრით, როდის გახდება საქართველო ჩრდილოატლანტიკური ალიანსის წევრი, გამოკითხულთა 23 პროცენტი პასუხობს, რომ 2024 წლის შემდეგ, 53 პროცენტმა კი, არ იცის/არ აქვს პასუხი, ხოლო 12 პროცენტი პასუხობს, რომ არასდროს.
რაც შეეხება ევროკავშირში გაწევრიანებას, გამოკითხულთა 83 პროცენტი მხარს უჭერს, ხოლო უარს აცხადებს გამოკითხულთა 9 პროცენტი.
კვლევა ჩატარდა საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ, 2021 წლის 2-26 თებერვლის პერიოდში. საველე სამუშაოები ჩატარდა „IPM-ის“ მიერ. მონაცემები შეგროვდა სტრატიფიცირებული მრავალსაფეხურიანი შემთხვევითი შერჩევის მეთოდის გამოყენებით, პირისპირ ინტერვიუს გზით. შერჩევა მოიცავდა საარჩევნო ხმის უფლებისა და ასაკის მქონე 1500 რესპონდენტს. მონაცემები შეწონილ იქნა ასაკის, გენდერის, რეგიონისა და დასახლების ზომის შესაბამისად. ცდომილების ზღვარი წარმოადგენს +/- 2.5 პროცენტს, გამოპასუხების მაჩვენებელი - 75 პროცენტი. კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.
