შეერთებული შტატების სენატის საგარეო ურთიერთობათა კომიტეტის თავმჯდომარე, დემოკრატი ბობ მენენდესი საქართველოში განვითარებულ მოვლენებს ეხმიანება.
სენატორი მენენდესი პოლიტიკური მხარეებს დიალოგის განახლებისკენ მოუწოდებს.
"იმედგაცრუებული ვარ, როდესაც ვხედავ საქართველოში დემოკრატიის უკუსვლას. პოლიტიკური უთანხმოება არასოდეს უნდა გადაწყდეს ძალადობით ან აგრესიით. მე, როგორც ქართველი ხალხის მეგობარი, მოვუწოდებ ყველას, დაუბრუნდნენ მშვიდობიანი პოლიტიკური დიალოგს", - წერს მენენდესი სოციალურ ქსელში.
ნაციონალური მოძრაობის" თავმჯდომარის ნიკა მელია დაკავებას საერთაშორისო საზოგადოების მწვავე რეაქცია მოჰყვა.
ნიკა მელიას დაკავებასთან დაკავშირებით შეშფოთება გამოთქვეს და პოლიტიკური დიალოგის განახლებისკენ მოუწოდეს აშშ-ის სახელმწიფო დეპარტამენტმა, ჰელსინკის კომისიამ, კონგრესმენებმა, სენატორებმა, პრეზიდენტ ბაიდენის მრჩეველმა ჯეიკ სალივანმა, ევროპარლამენტარებმა და ა.შ.
ნიკა მელია 23 თებერვალს დააკავეს. ის სპეცრაზმმა პარტიის ოფისიდან გამოიყვანა, სადაც მისი მხარდამჭერები და ოპოზიციური პარტიის წარმომადგენლები იმყოფებოდნენ.
სამართალდამცველებმა "ნაციონალური მოძრაობის" პარტიის ოფისის შენობაში წიწაკის სპრეი გამოიყენეს, რასთან დაკავშირებითაც სახალხო დამცველმა განაცხადა, რომ "დახურულ სივრცეში, წიწაკის გაზის, სპრეის გამოყენება უტოლდება არაადამიანურ მოპყრობას და წამებასაც კი".
"ნაციონალური მოძრაობის" განცხადებით, სამართალდამცავებმა ოფისიდან წაიღეს სერვერები.
ნიკა მელიას დაკავების შემდეგ მხარდამჭერებმა, სამოქალაქო აქტივისტებმა და ოპოზიციის წარმომადგენლებმა საპროტესტო აქცია გამართეს მთავრობის ადმინისტრაციის შენობასთან, მოგვიანებით აქცია გაგრძელდა პარლამენტის წინ.
ოპოზიციამ ნიკა მელიას გათავისუფლების მოთხოვნით საპროტესტო მსვლელობა 26 თებერვალს დაანონსა.
პროკურატურა ნიკა მელიას ჯგუფური ძალადობის ხელმძღვანელობას და მასში მონაწილეობას ედავება. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს.
ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 2021 წლის 17 თებერვალს შეუფარდა. 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.
ნიკა მელიას დაკავების გადაწყვეტილების აღსრულება მას მერე დაიწყო, რაც პარლამენტმა პრემიერის პოსტზე ირაკლი ღარიბაშვილს დაუჭირა მხარი, მან კი სიტყვით გამოსვლაში თქვა, რომ მელიას საქმეზე კანონი უნდა აღსრულდეს.