გერმანიის საგარეო საქმეთა მინისტრის, ჰაიკო მაასის განცხადებით რუსი ოპოზიციონერის, ალექსეი ნავალნის მოწამვლამ შესაძლოა გავლენა მოახდინოს მილსადენ "ჩრდილოეთის ნაკადი 2"-ის მომავალზე.
ჰაიკო მაასი კიდევ ერთხელ მოუწოდებს რუსეთის ფედერაციას, ჩაერთოს ნავალნის მოწამვლის საქმის გამოძიებაში.
საგარეო საქმეთა მინისტრის თქმით, გერმანია ამ დრომდე თავს იკავებდა ნავალნის მოწამვლა და "ჩრდილოეთის ნაკადი 2"-ის პროექტი ერთმანეთთან დაეკავშირებინა და იმედოვნებს, რომ რუსეთის პოზიცია იძულებულს არ გახდის, პროექტის მიმართ დამოკიდებულება შეიცვალოს.
ალექსეი ნავალნი შეუძლოდ 20 აგვისტოს, ტომსკიდან მოსკოვის მიმართულებით ფრენის დროს, გახდა. თვითმფრინავმა საგანგებო დაშვება ომსკის აეროპორტში მოახდინა. ოპოზიციონერი კომატოზურ მდგომარეობაში ომსკის საავადმყოფოს რეანიმაციულ განყოფილებაში მოათავსეს. 22 აგვისტოს იგი გერმანიაში, ბერლინის "შარიტეს" კლინიკაში გადაიყვანეს სამკურნალოდ.
2 სექტემბერს გერმანიის ხელისუფლებამ განაცხადა, რომ ნავალნის ორგანიზმში აღმოჩენილია ქიმიური ნივთიერება "ნოვიჩოკი", რომელიც პირველად სერგეი სკრიპალისა და მისი ქალიშვილის მოწამვლის დროს გახდა ცნობილი, 2018 წლის მარტში.
მაშინ ბრიტანეთის ხელისუფლებამ სკრიპალების მოწამვლის ორგანიზებაში რუსული სპეცსამსახურებს დასდო ბრალი და ქვეყნიდან ათეულობით რუსი დიპლომატი გააძევა. მოსკოვი დღემდე უარყოფს ამ ბრალდებებს.
ანგელა მერკლემა ნავალნის მოწამვლის გარემოებთან დაკავშირებით ახსნა-განმარტებების გაკეთება რუსეთის ხელისუფლებას მოსთხოვა. მისი განცხადებით, ნავალნი დანაშაულის მსხვერპლია და იგი "გაჩუმების მიზნით მოწამლეს".
მერკელის განცხადებით, უტყუარი მტკიცებულებები არსებობს, რომ ნავალნი დანამდვილებით "ნოვიჩოკით" მოწამლეს.
რუსეთის ხელისუფლება მტკიცედ უარყოფს ნავალნის მოწამვლასთან რაიმე სახის კავშირს.
ნერვული აგენტი "ნოვიჩიკი" თავდაპირველად საბჭოთა ლაბორატორიებში შეიქმნა, მოგვიანებით იგი განავითარეს რუსმა მეცნიერებმა. საწამლავი ანადგურებს ადამიანის ნერვულ სისტემას.
ფოტო: EPA
