მომავალი საპარლამენტო არჩევნების ჩატარების შედეგად არჩეულ პარლამენტს დაახლოებით წელიწადსა და სამ თვეს დღეს მოქმედი კონსტიტუციით მოუწევს მუშაობა. ამას განაპირობებს ის ფაქტი, რომ საკონსტიტუციო პროექტის თანახმად, ცვლილებები, რომელიც შეეხება პარლამენტის, პრეზიდენტისა და მთავრობის ახლებურად რეგულირებას, ამოქმედდება მხოლოდ 2013 წლის 31 დეკემბრიდან. ამ დროისთვის პარლამენტი იქნება დაახლოებით ერთი წლის და სამი თვის არჩეული, საპრეზიდენტო არჩევნები კი ორი თვის ჩატარებული.
საპარლამენტო არჩევნები ჩატარდება 2012 წლის ოქტომბერში, საპრეზიდენტო კი 2013 წლის ოქტომბერში. როგორც საკონსტიტუციო კომისიის თავმჯდომარის მოადგილემ თენგიზ შარმანაშვილმა პარლამენტში ჟურნალისტებთან საუბრისას განმარტა, კომისია აღნიშნული პრობლემის გადაწყვეტისას იდგა დილემის წინაშე: ან უნდა წასულიყვნენ იმ გზით, რომ საპრეზიდენტო და საპარლამენტო არჩევნები ჩატარებულიყო ერთდროულად, რაც მისი თქმით, განმაპირობებელი იქნებოდა ერთპარტიული ხელისუფლებისა, ან უნდა აერჩიათ ის გზა, რომლის მიხედვითაც პარლამენტს გარკვეული პერიოდის განმავლობაში მოუწევს ძველი კონსტიტუციით მუშაობა, შემდეგ კი ახალი კონსტიტუციით.
საკონსტიტუციო ცვლილებების პროექტი საკონსტიტუციო პროექტის საზოგადოებრივი განხილვის ჯგუფმა დღეს პარლამენტში იმ არასამთავრობო ორგანიზაციებთან განიხილა, რომლებიც უმცირესობების საკითხებზე მუშაობენ.
