„ერთმა მოწმემ გამოძიებაში მიცემული ჩვენება კატეგორიულად შეცვალა უმნიშვნელოვანეს მომენტებთან დაკავშირებით და ფაქტობრივად განსხვავებული ინფორმაცია მიაწოდა სასამართლოს“, - განაცხადა ხორავას ქუჩაზე მოზარდების მკვლელობის საქმეზე ერთ-ერთი არასრულწლოვანი ბრალდებულის ადვოკატმა, ტარიელ კაკაბაძემ.
მისი განმარტებით, მეორე მოწმეს სასამართლოსთვის მნიშვნელოვანი ინფორმაცია არ მიუწოდებია.
„რაც შეეხება მეორე მოწმეს, მისი ჩვენება გარკვეულ დეტალებთან დაკავშირებით ეწინააღმდეგება წინა მოწმის ჩვენებას, მას ჩვენი აზრით რაიმე მნიშვნელოვანი ინფორმაციას სასამართლოსთვის არ მიუწოდებია. მინდა ასევე აღვნიშნო, რომ პირველი მოწმის ჩვენება კატეგორიულად ეწინააღმდეგება საქმეში დაკითხულ სხვა მოწმეთა ჩვენებებს“, - აღნიშნა კაკაბაძემ.
როგორც ადვოკატი აცხადებს, დანების ექსპერტიზით ბევრ დეტალს მოეფინება ნათელი.
„რაც შეეხება დანების ექსპერტიზას, ეს არის უმნიშვნელოვანესი, ვინაიდან თუკი ექსპერტიზა ჩატარდება სრულყოფილად, ბევრ დეტალს, ბევრ ფაქტს მოეფინება ნათელი და საზოგადოებას, ისევე როგორც სასამართლოს უკვე ეცოდინება რეალურად რა მოხდა. დაცვის მხარეს დანიშნული გვაქვს ექსპერტიზა, სადაც პირდაპირ პასუხი გაეცემა იმ კითხვას, თუ რამდენი დანა იყო გამოყენებული დანაშაულში. თუ ამ კითხვაზე პასუხი არ იქნება გაცემული, შეუძლებელია საქმეზე უტყუარი ჭეშმარიტება დადგინდეს“, - განაცხადა კაკაბაძემ.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.