"ყველა ქვეყანას აქვს თავდაცვის უფლება და აირჩიოს ალიანსი, სადაც გაწევრიანება სურს", - ამის შესახებ ამერიკის სახელმწიფო მდივნის თანაშემწემ ფილიპ გორდონმა განაცხადა.
"ამერიკის შეერთებულ შტატებს საქართველოსთან იარაღზე ემბარგო არ დაუწესებია და სამხედრო სფეროში თანამშრომლობას განაგრძობს. თუმცა, ვაშინგტონში მიიჩნევს, რომ საქართველოს პრობლემა სამხედრო გზით არ გადაწყდება, ის უნდა გახდეს უფრო დემოკრატიული და აყვავებული ქვეყანა, რის შემდეგაც აფხაზეთისა და სამხრეთ ოსეთის მცხოვრებლებს თავად გაუჩნდებათ სურვილი ერთიანი საქართველოს ნაწილი გახდნენ", - განაცხადა გორდონმა.
ამასთან, აშშ-ს სახელმწიფო მდივნის თანაშემწემ საქართველოს ტერიტორიული მთლიანობისა და სუვერენიტეტის მხარდაჭერა და პატივისცემა ობამას ადმინისტრაციის სახელით კიდევ ერთხელ დააფიქსირა და რუსეთს აღებული ვალდებულების შესრულებისკენ მოუწოდა.
"ჩვენ პატივს ვცემთ საქართველოს ტერიტორიულ მთლიანობასა და სუვერენიტეტს. მოვუწოდებთ, რუსეთს დაიცვას 2008 წლის ცეცხლის შეწყვეტის შესახებ ხელშეკრულებით გათვალისწინებული ვალდებულები, რომელიც არა მხოლოდ ძალის გამოუყენებლობასა და მტრობის შეწყვეტას გულისხმობს, ასევე სამხედრო ძალების დაბრუნებას იმ პოზიციებზე, სადაც ისინი კონფლიქტის დაწყებამდე იმყოფებოდნენ. რუსეთის მხრიდან ეს ვალდებულება ჯერ არ შესრულებულა", - აღნიშნა გორდონმა.
მისვე შეფასებით, ასევე აუცილებელია ოკუპირებულ ტერიტორიებზე მეტი გამჭირვალობა იყოს.
"საქართველოს კონტროლირებად ტერიტორიაზე ეს გამჭირვალობა არსებობს. იქ საერთაშორისო მისიები საქმიანობენ და მთელ მსოფლიოს შეუძლია დაინახოს რა ხდება ქვეყანაში. რაც შეეხება სამხრეთ ოსეთსა და აფხაზეთს იქ საერთაშორისო დამკვირვებლების არ უშვებენ და ჩვენ ამ საკითხს რუსეთთან მოლაპარაკებებზე გამუდმებით ვაყენებთ", - განაცხადა კლინტონის თანაშემწემ სახელმწიფო დეპარტამენტში გამართულ ბრიფინგზე.
