უნგრეთის მთავრობაში განაცხადეს, რომ მას შემდეგ რაც შეერთებული შტატები ჯანდაცვის მსოფლიო ორგანიზაციიდან გამოვიდა, უნგრეთმაც უნდა იფიქროს ამაზე.
ამის შესახებ 7 თებერვალს უნგრეთის პრემიერ-მინისტრის ადმინისტრაციის ხელმძღვანელმა გერგეი გულიასმა განაცხადა, წერს Politico.
მისი თქმით, „თუ მსოფლიოს ყველაზე ძლიერმა ქვეყანამ გადაწყვიტა დატოვოს საერთაშორისო ორგანიზაცია“, მაშინ უნგრეთის მთავრობამ ასევე უნდა განიხილოს გადადგას თუ არა „ეს ნაბიჯი“.
მან ხაზგასმით აღნიშნა, რომ მთავრობა "ფრთხილად იმოქმედებს".
"შეიძლება მივიდეთ დასკვნამდე, რომ ეს არ უნდა გავაკეთოთ, შეიძლება სხვაგვარად გადავწყვიტოთ, რა თქმა უნდა. მაგრამ ეს რა თქმა უნდა გასათვალისწინებელია", - თქვა გულიასმა.
გამოცემა იტყობინება, რომ რუსეთის პარლამენტის ვიცე-სპიკერმა, პიოტრ ტოლსტოიმ, ასევე ისაუბრა ორგანიზაციიდან რუსეთის შესაძლო გასვლის შესახებ.
„დადგა დრო, რომ საფუძვლიანად გამოვიკვლიოთ ჯანდაცვის მსოფლიო ორგანიზაციის საქმიანობა რუსეთში.
გამოძიების დროს რუსეთის წევრობა მაინც უნდა შეჩერდეს. ან კიდევ უკეთესი, საერთოდ დავემშვიდობოთ“, - განაცხადა ტოლსტოიმ.
შეგახსენებთ, იანვარში აშშ-ის პრეზიდენტმა დონალდ ტრამპმა ჯანდაცვის მსოფლიო ორგანიზაციიდან გასვლის შესახებ განაცხადა.
