სლოვაკეთის პრემიერ-მინისტრის რობერტ ფიცოს მთავრობის წინააღმდეგ საპროტესტო აქციები კვლავ განახლდა სლოვაკეთის ქალაქებში.
აქციები ქვეყნის 50-ზე მეტ ქალაქში მიმდინარეობს.
„სლოვაკეთი ევროპაა“ - ქვეყნის მასშტაბით აქციები ამ ლოზუნგით იმართება. დემონსტრანტები გამოხატავენ უკმაყოფილებას ამჟამინდელი მთავრობის პოლიტიკის და შეშფოთებას იმის გამო, რომ ქვეყნის ამჟამინდელი ხელმძღვანელობა ევროკავშირისა და ნატო-ს დატოვებისთვის ემზადება.
ბრატისლავაში ღონისძიების ორგანიზატორია საზოგადოებრივი ინიციატივა „მშვიდობა უკრაინაში“, რომელიც აცხადებს, რომ ხელისუფლება სლოვაკებს სახელმწიფო გადატრიალებით აშინებს.
„ისინი აშინებენ სლოვაკებს სახელმწიფო გადატრიალებით, მაგრამ გადატრიალება არ იქნება. ჩვენი პროტესტი მშვიდობიანი და ღირსეულია. მათ აშინებენ, რადგან სხვა არაფერი იციან“, - აცხადებენ გაერთიანებაში.
"ეს მხოლოდ ზღაპრები, სიცრუე და ბოდვაა. სლოვაკებმა კარგად იციან, რომ ჩვენი სამშობლოს რეალური საფრთხე არის პრემიერ-მინისტრი, რომელიც თანამშრომლობს ჩვენს მტერთან", - აცხადებენ საზოგადოებრივი ინიციატივის წარმომადგენლები. ისინი გულისხმობენ ფიცოს პოლიტიკას და მთავრობისა და მმართველი პარტიის წარმომადგენლების ვიზიტებს რუსეთში.
აქციის ორგანიზატორების თქმით, ფიცოს მთავრობა საფრთხეს უქმნის სლოვაკეთის მომავალს დემოკრატიულ და თავისუფალ ევროპაში.
"ჩვენ არ დავუშვებთ ავტორიტარულ პრაქტიკას და პრორუსული პროპაგანდის დომინირებას ჩვენს ქვეყანაში ", - აცხადებენ აქციების ორგანიზატორები.
პროტესტი იმართება სლოვაკეთის ფარგლებს მიღმაც. საზღვარგარეთ მცხოვრები სლოვაკები აპროტესტებენ პრაღაში, ბრნოში, ბერლინში, ბრიუსელში, კრაკოვში, ლონდონში, ნიუ-იორკში, პარიზში, ლუქსემბურგსა და სხვა ქალაქებში.
პარასკევს ფიცომ ფეისბუქზე დაწერა: „მაინტერესებს, რეალურად რატომ აპირებს ხალხი დღეს პროტესტს“.
შემდეგ მან დაამატა სტატია, რომელშიც ნათქვამია, რომ ევროკომისია ვერ ხედავს რაიმე მინიშნებას იმისა, რომ სლოვაკეთი ევროკავშირიდან გასვლას განიხილავს.
